ირანის ომის გამო Chevron-ის მოგება 36%-ით შემცირდა

ამერიკულმა ენერგეტიკულმა გიგანტმა Chevron-მა მიმდინარე წლის პირველი კვარტალის ფინანსური ანგარიში წარადგინა, რომლის მიხედვითაც კომპანიის მოგება მნიშვნელოვნად შემცირდა.

საანგარიშო პერიოდში Chevron-ის შემოსავალმა $48.61 მილიარდი შეადგინა, რაც ანალიტიკოსების მიერ პროგნოზირებულ $52.1 მილიარდზე მკვეთრად ნაკლებია. ამის მიუხედავად, კორექტირებულმა მოგებამ თითო აქციაზე $1.41 შეადგინა, რითაც კომპანიამ Wall Street-ის მოლოდინს გადააჭარბა. რაც შეეხება წმინდა მოგებას, თუ გასული წლის ანალოგიურ პერიოდში ეს მაჩვენებელი $3.5 მილიარდზე იყო, ამჯერად მოგება $2.2 მილიარდამდე დაეცა.

როგორც ირკვევა, კომპანიის მაჩვენებლებზე უარყოფითი გავლენა ირანში მიმდინარე საომარმა მოქმედებებმა და ფინანსურმა ჰეჯირებამ იქონია. ომის გამო ნავთობის მიწოდების ჯაჭვი მნიშვნელოვნად შეფერხდა, რამაც ბაზარზე ფასების მკვეთრი ზრდა გამოიწვია. Chevron-ის აღმასრულებელმა დირექტორმა, მაიკ უირთმა განაცხადა, რომ გლობალური ენერგეტიკული სისტემა ამჟამად "უკიდურესი სტრესის" პირობებში იმყოფება. იგი მიიჩნევს, რომ ნავთობის ფასი იქამდე მოიმატებს, სანამ ჰორმუზის სრუტეში ნაოსნობა არ აღდგება.

რაც შეეხება ცალკეულ სეგმენტებს, Chevron-ის ამერიკულმა გადასამუშავებელმა ქარხნებმა მოგება 90%-ით გაზარდეს. აქედან კომპანიამ $196 მილიონის შემოსავალი მიიღო. ამერიკულის საპირისპირო შედეგი დაფიქსირდა საერთაშორისო გადასამუშავებელი ობიექტების მიმართულებით, სადაც ზარალმა $1 მილიარდს გადააჭარბა. როგორც ირკვევა, ასეთი მკვეთრად უარყოფითი შედეგი ტრანსპორტირების ხარჯების ზრდამ გამოიწვია.