ისრაელის არჩევნებში გამარჯვებული არ გამოიკვეთა - ლიდერობს ნეთანიაჰუს ბლოკი

ისრაელში გამართული საპარლამენტო არჩევნების საბოლოო შედეგებმა აჩვენა, რომ გამოკვეთილი გამარჯვებული არ არსებობს - ორ ძირითად ბლოკს 120-ადგილიან ქნესეთში უმრავლესობის მოსაპოვებლად მანდატები არ ჰყოფნის.

პრემიერ-მინისტრ ბენიამინ ნეთანიაჰუს ბლოკმა 53 ადგილი მოიპოვა, ხოლო ოპოზიციურმა ბანაკმა, მისი კონკურენტის, გადი აიზენკოტის ცენტრისტული პარტია "იაშარის" ხელმძღვანელობით - 48.

უშუალოდ ნეთანიაჰუს მემარჯვენე პარტია "ლიკუდი" 27 მანდატით უმსხვილეს პარტიად დარჩა, არაბულმა პარტიებმა კი ჯამურად რეკორდული 19 ადგილი დაიკავეს.

ეს შედეგი ნიშნავს, რომ ისრაელს ხანგრძლივი და რთული კოალიციური მოლაპარაკებების პერიოდი ელის. შეთანხმების მიუღწევლობის შემთხვევაში, ქვეყანაში ხელახალი არჩევნები დაინიშნება.

შემდეგ ეტაპზე ისრაელის პრეზიდენტი ისააკ ჰერცოგი ქნესეთში გასული პარტიების ლიდერებთან კონსულტაციებს გამართავს, რის შემდეგაც მთავრობის ფორმირებას იმ კანდიდატს დაავალებს, რომელსაც, მისი აზრით, საკმარისი მხარდაჭერის მოპოვების საუკეთესო შანსი ექნება.

ისრაელის კანონმდებლობით, ამ კანდიდატს კაბინეტის შესადგენად 28 დღე ექნება. საჭიროების შემთხვევაში, პრეზიდენტს ამ ვადის მაქსიმუმ 14 დღით გაგრძელება შეუძლია.

თუ მცდელობა წარუმატებელი აღმოჩნდა, პრეზიდენტს შეუძლია შანსი მეორე ლიდერს მისცეს - მხოლოდ მაქსიმუმ 28-დღიანი ვადით. თუ მეორე რაუნდიც ჩაიშლება, ქნესეთს შეუძლია მოითხოვოს მესამე კანდიდატის დასახელება, რომელსაც ამოცანის შესასრულებლად 14 დღე მიეცემა.

თუ ყველა მცდელობა უშედეგოდ დასრულდება, ქვეყანაში ხელახალი საპარლამენტო არჩევნები დაინიშნება.