ივნისში ინფლაციური მოლოდინები შემცირდა - ეროვნული ბანკი

საქართველოს ეროვნულმა ბანკმა 2026 წლის ივნისის ინფლაციური მოლოდინების კვლევის შედეგები გამოაქვეყნა. დოკუმენტის მიხედვით, გასულ თვეს ეკონომიკური საქმიანობის მონაწილეების ერთწლიან და სამწლიან პერიოდში ინფლაციის მოლოდინები, საერთო ჯამში, შემცირდა.

კვლევის თანახმად, ერთწლიან პერიოდში შემცირდა იმ რესპონდენტთა წილი, რომლებიც ინფლაციას 8%-ზე მეტს ან 6%-8%-ის ფარგლებში ელოდებიან. პარალელურად, მნიშვნელოვნად გაიზარდა იმ მონაწილეთა რაოდენობა, რომლებიც მომდევნო ერთი წლის განმავლობაში ფასების ზრდას 4%-6%-ის ინტერვალში პროგნოზირებენ.

ეროვნული ბანკის მონაცემებით, შემცირების ტენდენცია სამწლიან ინფლაციურ მოლოდინებშიც შეინიშნება. კერძოდ, ნაკლებია იმ რესპონდენტების წილი, რომლებიც მომდევნო სამი წლის განმავლობაში ინფლაციას 6%-8%-ის ფარგლებში მოელიან. ამასთან, გაიზარდა მათი რაოდენობა, ვინც ფასების ცვლილებას -2%-0%-ისა და 4%-6%-ის ინტერვალში პროგნოზირებს. თუმცა, კვლევის მიხედვით, ასევე მოიმატა იმ რესპონდენტთა წილმაც, რომლებიც ინფლაციას 8%-ზე მეტად ელოდებიან.

კვლევა ასევე აჩვენებს, რომ კომპანიების მიერ საკუთარ პროდუქციასა და მომსახურებაზე ფასების ზრდის მოლოდინი შემცირდა. კერძოდ, შემცირდა იმ რესპონდენტთა რაოდენობა, რომლებიც მომდევნო ერთი წლის განმავლობაში საკუთარი პროდუქციისა და მომსახურების ფასების 4%-6%-ით, 6%-8%-ით ან 8%-ზე მეტად ზრდას ელოდებიან. ამის პარალელურად, გაიზარდა იმ მონაწილეთა წილი, რომლებიც ფასების 0%-2%-ის ფარგლებში ცვლილებას ან საერთოდ უცვლელად შენარჩუნებას პროგნოზირებენ.

გამოკითხვის შედეგების მიხედვით, ივნისში მაისთან შედარებით ხელფასების ზრდის მოლოდინიც შემცირდა. ნაკლებია იმ რესპონდენტების რაოდენობა, რომლებიც ხელფასების 10%-20%-ით ან 20%-30%-ით ზრდას ელოდებიან, ხოლო გაიზარდა მათი წილი, ვინც ხელფასების უცვლელად შენარჩუნებას ვარაუდობს.