ივნისში საქართველოს ეკონომიკა 8.6%-ით, 2026 წლის I ნახევარში კი 7.9%-ით გაიზარდა | საქსტატი

საქსტატის წინასწარი შეფასებით, 2026 წლის ივნისში წინა წლის შესაბამის პერიოდთან შედარებით, რეალური მთლიანი შიდა პროდუქტის (მშპ) ზრდამ 8.6% შეადგინა, ხოლო პირველი ექვსი თვის საშუალო მაჩვენებელი 7.9%-ით განისაზღვრა.

საქსტატის თანახმად, ივნისში საქართველოს კერძო სექტორის, ანუ დღგ-ის გადამხდელი კომპანიების ბრუნვამ 16.7 მილიარდი ლარი შეადგინა, რაც წლიურად 14%-ით გაზრდილი მაჩვენებელია. ეკონომიკის კონკრეტულ სექტორებს შორის კი ზრდა ფიქსირდება ფაქტობრივად ყველა მიმართულებით, გარდა ენერგეტიკის და სამთო მოპოვებითი სექტორებისა.

"2026 წლის ივნისში, წინა წლის შესაბამის პერიოდთან შედარებით, ზრდის მიმართულებით მნიშვნელოვანი წვლილი შეიტანა შემდეგმა დარგებმა: დამმუშავებელი მრეწველობა, ტრანსპორტი და დასაწყობება, მშენებლობა, ინფორმაცია და კომუნიკაცია, საფინანსო და სადაზღვევო საქმიანობები. კლების ტენდენცია დაფიქსირდა სამთო-მოპოვებითი მრეწველობის და ენერგეტიკის სექტორებში", - წერს საქსტატი.