JPMorgan-მა კვარტალური მოგების პროგნოზი ვერ გაამართლა

ამერიკულმა საბანკო-საფინანსო გიგანტმა, JPMorgan Chase-მა ბოლო სამ წლის განმავლობაში პირველად, კვარტალური მოგების პროგნოზი ვერ გაამართლა.

უოლ-სტრიტის ანალიტიკოსები ერთ აქციაზე გადანაწილებულ მოგებას $5.85-ის დონეზე ვარაუდობდნენ, რეალურმა მაჩვენებელმა $5.57 შეადგინა. ექსპერტთა შეფასებით, ფინანსური შედეგების გაუარესება ბაზარზე არსებულმა მერყეობამ და ბუნდოვანმა ეკონომიკურმა პერსპექტივამ განაპირობა. შედეგად, ბოლო თვეებში საინვესტიციო გარიგებების რაოდენობა და ობლიგაციებით ვაჭრობის აქტივობა მნიშვნელოვნად შემცირდა.

რაც შეეხება საერთო შემოსავალს, მან გასულ კვარტალში $50.2 მილიარდი შეადგინა, რაც 8%-ით გაზრდილი მაჩვენებელია, თუმცა $1 მილიარდით ჩამორჩება ანალიტიკოსების მოლოდინებს. ასევე პროგნოზირებულზე ნაკლებია წმინდა მოგება, რომელიც ამჟამად $15.3 მილიარდს შეადგენს.

აღსანიშნავია, რომ მესამე კვარტალში საინვესტიციო საბანკო მომსახურების საკომისიოები წინა კვარტალთან შედარებით 8%-ით შემცირდა. მიუხედავად ამისა, გასული წლის ანალოგიურ პერიოდთან მიმართებით ამ სეგმენტში მაინც 14%-იანი ზრდა დაფიქსირდა. რაც შეეხება ბაზრების განყოფილებას, აქ წლიურმა შემოსავალმა 15%-ით მოიმატა.

რაც შეეხება სამომავლო პროგნოზებს, ბანკის მენეჯმენტი მიმდინარე წელს საერთო საპროცენტო შემოსავლის სახით $106.2 მილიარდის მიღებას ვარაუდობს. ამასთან, ბაზრების მიღმა წმინდა საპროცენტო შემოსავლის საორიენტაციო მაჩვენებელმა $97.2 მილიარდი უნდა შეადგინოს. და მაინც, 2027 წლისთვის კომპანია დასახელებული მაჩვენებლის $107 მილიარდამდე ზრდას პროგნოზირებს.

რაც შეეხება რეაქციას საფონდო ბირჟაზე, პრემარკეტზე ფინანსური ანგარიშის გამოქვეყნების შემდეგ აქციების ფასი თავდაპირველად 3%-ით შემცირდა. მოგვიანებით სურათი შეიცვალა და დანაკარგის აღდგენის ფონზე ფასიანი ქაღალდების ღირებულება 0.8%-ით გაიზარდა.

ცნობისთვის, მიმდინარე წლის დასაწყისში საინვესტიციო გარიგებების ბაზარზე მაღალი აქტივობა ფიქსირდებოდა. მიუხედავად ამისა, ბოლო კვირებში ტემპი მნიშვნელოვნად შენელდა, რამაც საბანკო სექტორის შემოსავლებზე უარყოფითი გავლენა იქონია.