KA Group-მა ₾1.5 მილიონად სასტუმრო Quadrum-ის 27%-იანი წილი შეიძინა - ირაკლი ჭიღლაძე

სასტუმროების მენეჯმენტკომპანია KA Group-მა სასტუმრო Quadrum Ski & Yoga Resort-ის 27%-იანი წილი იყიდა.

აღნიშნულ გარიგებაზე და კომპანიის სამომავლო გეგმებზე BMGTV-ის გადაცემა „წერტილში“ KA Group-ის დამფუძნებელმა ირაკლი ჭიღლაძემ ისაუბრა.

ვიდრე Quadrum-ის თანამფლობელი გახდებოდა, KA Group-ი 21-ნომრიანი ბუტიკ-სასტუმროს მმართველი კომპანია იყო. როგორც ირაკლი ჭიღლაძემ თქვა, Quadrum-ის 27%-იანი წილი ₾1.5 მილიონად შეიძინა.

ბიზნესრეესტრის თანახმად, სასტუმროს მფლობელი შპს "ბარაკონია", რომლის საკონტროლო პაკეტი (57%) ეკუთვნის კონსტანტინე ლუსინიან-რიჟინაშვილს, 27%-ის მფლობელი უკვე KA Group-ია; 12%-ის მესაკუთრეა ირაკლი ერისთავი, ხოლო 5% გიორგი ბაზღაძეს ეკუთვნის.

ირაკლი ჭიღლაძის თქმით, ეს არის პირველი შემთხვევა, როდესაც მმართველი კომპანია თავის პორტფელში არსებული სასტუმროს თანამესაკუთრე გახდა.

"როდესაც სასტუმროების მენეჯმენტ კომპანია „კა ჯგუფმა“ ფუნქციონირება დაიწყო, მისი საწესდებო კაპიტალი აბსოლუტურად ნული ლარი იყო. დღეს 12 სასტუმროს ვმართავთ და ეტაპობრივად მოვედით აქამდე. Quadrum-ის წილის შეძენა ბიზნესის განვითარების ახალი, ლოგიკური ეტაპია, რაც ძალიან გვახარებს“, - განაცხადა ირაკლი ჭიღლაძემ.

როგორც KA Group-ის დამფუძნებელმა განმარტა, 21-ნომრიანი სასტუმროს მფლობელებისთვის ეს გადაწყვეტილება გრძელვადიანი სტაბილურობის გარანტიაა, ხოლო მმართველი კომპანიისთვის - პარტნიორებთან ურთიერთობის ახალი გამოცდილება.

"Quadrum-ი 21-ნომრიანი სასტუმროა. „კა ჯგუფის“ განვითარების გარკვეულ ეტაპზე შესაძლოა დამდგარიყო მომენტი, როცა ამ სასტუმროს მართვას უბრალოდ ვერ შევძლებდით და დავემშვიდობებოდით. ამ ნაბიჯით არსებულმა მფლობელმა გაიმყარა გარანტია, რომ „კა ჯგუფი“ მისი ფუნქციონირების მანძილზე მუდმივად იქნება ამ სასტუმროს მმართველი.