კახეთში გადამუშავებულია 100 ათასამდე ტონა ყურძენი - სახელმწიფო კომპანია ყურძენს 22 ლოკაციაზე იბარებს

28 სექტემბრის მდგომარეობით, კახეთში გადამუშავებულია 100 ათასამდე ტონა ყურძენი. კახეთში ყურძნის მოსავალი 7 000-მდე მევენახემ დააბინავა.

ღვინის ეროვნული სააგენტოს თავმჯდომარის ლევან მეხუზლას განცხადებით, რთველი კახეთში პიკურ ფაზაშია.

"70 ათას ტონამდე მაღალი კონდიციის და ხარისხიანია, მთელი მოსავლის მხოლოდ 0,7%-ია უხარისხო და მკვახე. რთველი კახეთში პიკურ ფაზაშია - გასული დღე-ღამის მანძილზე 14 ათას ტონამდე ყურძენი გადამუშავდა. სახელმწიფო საწარმო „მოსავლის მართვის კომპანია“ მევენახეებისგან ყურძენს 22 ლოკაციაზე იბარებს. მოსავლის დაბინავება სხვადასხვა აქტიურობით კახეთის ყველა მუნიციპალიტეტში მიმდინარეობს", - განაცხადა ლევან მეხუზლამ.

საპროგნოზო მოსავალი 320 ათასი ტონის ფარგლებშია. კახეთში, ყურძნის საჭირო კონდიციაში შესვლისთვის არახელსაყრელი ამინდების გამო, 22 სექტემბერს მიღებული იყო გადაწყვეტილება კორექტივები შესულიყო ჩასაბარებელი ყურძნის ფასებსა და შაქრიანობის ზღვრებში: მაღალკონდიციური ყურძენი: 20 გრადუსიდან ზემოთ საფერავის შემთხვევაში - 1.50 ლარი; 19 გრადუსიდან ზემოთ რქაწითელის და სხვა დანარჩენი ყურძნის შემთხვევაში - 1.30 ლარი; დაბალკონდიციური ყურძენი: 16-დან 20 გრადუსამდე საფერავი - 1 ლარი; 16-დან 19 გრადუსამდე რქაწითელი და სხვა დანარჩენი ყურძენი - 90 თეთრი; 16%-ზე დაბალი, არაკონდიციური და დაზიანებული - 50 თეთრი