კატარის ელჩმა ლაშა ხუციშვილი AIIB-ის ყოველწლიურ შეხვედრაზე დასასწრებად მიიწვია
საქართველოს ფინანსთა მინისტრი ლაშა ხუციშვილი საქართველოში კატარის სახელმწიფოს საგანგებო და სრულუფლებიან ელჩს, ალი იუსეფ აბდულრაჰმან ალ-მულას შეხვდა.
ფინანსთა სამინისტროს ინფორმაციით, გაცნობითი ხასიათის შეხვედრაზე მხარეებმა საქართველოსა და კატარს შორის ორმხრივ და მრავალმხრივ ფორმატებში თანამშრომლობის საკითხები განიხილეს.
"შეხვედრის ფარგლებში კატარის ელჩმა ფინანსთა მინისტრს აზიის ინფრასტრუქტურის საინვესტიციო ბანკის (AIIB) ყოველწლიურ შეხვედრაზე დასასწრებად ოფიციალური მოწვევა გადასცა. ღონისძიება კატარის სახელმწიფოში გაიმართება.
მხარეებმა ასევე ისაუბრეს საფინანსო, სავაჭრო და სხვა მიმართულებებით თანამშრომლობის გაღრმავების შესაძლებლობებზე და ამ სფეროებში პარტნიორობის შემდგომი გააქტიურების პერსპექტივებზე", - აღნიშნულია ფინანსთა სამინისტროს გავრცელებულ პრესრელიზში.
BM.GE
წყარო: bm.ge