ხომ არ იგეგმება რიკოთის მაგისტრალის ფასიან მონაკვეთად გადაკეთება? - TCRC-ის შეფასება

სატრანსპორტო დერეფნის კვლევის ცენტრის (TCRC) შეფასებით, მოსახლეობის სოციალურ-ეკონომიკური მდგომარეობის გათვალისწინებით, მიზანშეწონილია, სახელმწიფომ ჩამოაყალიბოს მოკლე და გრძელვადიანი ხედვა ფასიან გზებთან დაკავშირებით.

ცენტრში აცხადებენ, რომ ინფრასტრუქტურის სამინისტროს განცხადება გომი-საჩხერე-ჭიათურა- ზესტაფონის ალტერნატიული საავტომობილო გზის რეაბილიტაციის პროცესის დაჩქარებაზე აჩენს კითხვას, ხომ არ უკავშირდება ეს აღმოსავლეთ - დასავლეთის რიკოთის მაგისტრალის ფასიანად გადაკეთებას.

კვლევის ცენტრის განცხადებითვე, მიუღებელია, მოსახლეობა პოსტფაქტუმ დადგეს ფასიანი გზების ამოქმედების რეალობის წინაშე.

"ახლახან ინფრასტრუქტურის სამინისტრომ გაავრცელა განცხადება, რომელიც შიდასახელმწიფოებრივი დანიშნულების გომი - საჩხერე - ჭიათურა - ზესტაფონის გზის მონაკვეთის რეაბილიტაციის პროცესის დაჩქარებას ეხებოდა.

აღნიშნული მონაკვეთი ე.წ. გაჭიანურებულ და მრავალჯერ გადავადებულ პროექტთა ნუსხას მიეკუთვნება, რომლის რეაბილიტაცია ჯერ კიდევ 2023 წელს უნდა დასრულებულიყო, ამიტომ სამინისტროს განცხადებაში უჩვეულო არაფერია. პირიქით, სამინისტროს მცდელობა, პროექტი შემჭიდროებულ ვადებში დაასრულოს, მისასალმებელია.

განცხადების შინაარსიდან გამომდინარე, სადაც აქცენტი საგზაო მონაკვეთის “ალტერნატიულობის” კომპონენტზეა გადატანილი, დამატებით კითხვას ბადებს, ხომ არ იგეგმება გომი - საჩხერე - ჭიათურა - ზესტაფონის გზის მონაკვეთის რეაბილიტაციის შემდგომ რიკოთის მაგისტრალის ფასიან მონაკვეთად გადაკეთება?

ტექნიკურად, არსებობს ძირულა - ხარაგაული - მოლითი - ფონა - ჩუმათელეთის გზა, რომელიც თითქმის რეაბილიტირებულია და სრულად ასფალტობეტონის საფარი გააჩნია, მაგრამ იგი პროექტირებული იყო, პირველ რიგში, ადგილობრივი და რეგიონული მნიშვნელობის მოძრაობისთვის. მძიმე სატვირთო ავტოტრანსპორტის მოძრაობისთვის სრულად ადაპტირებული არ არის, ამიტომ მისი გამოყენება მძიმე სატვირთოების მასობრივი მოძრაობისთვის შეზღუდულია და ალტერნატივად ვერ გამოიყენება.