კობახიძის თქმით, როგავას, ხაბეიშვილის და მაისაშვილის თავდამსხმელების დაკავებამ სამართალდამცავი ორგანოების კოორდინაციის მნიშვნელობა დაადასტურა
ირაკლი კობახიძის თქმით, გუშინ გურამ როგავას, ლევან ხაბეიშვილის და ზვიად მაისაშვილის მიმართ ძალადობისთვის თავდამსხმელების დაკავების ფაქტმა სამართალდამცავი ორგანოების კოორდინაციის განსაკუთრებული მნიშვნელობა დაადასტურა.
„ჩვენ გვაქვს ჩვენი ხელწერა, ჩვენ გვაქვს ჩვენი ამბიცია, ვიმოქმედოთ ევროპულზე და ამერიკულზე მაღალი სტანდარტით, ჰუმანურობის მაღალი სტანდარტით, მაშინაც, როდესაც სახელმწიფოს უწევს დაუპირისპირდეს კონსტიტუციური წყობილების შეცვლის ძალადობრივ მცდელობებს. ეს ხელწერა კიდევ ერთხელ ვაჩვენეთ. ძალიან მნიშვნელოვანია, ამ ხელწერის და სტანდარტის დასაცავად დაუსჯელი არ დარჩეს ძალის გადამეტების არცერთი შემთხვევა. სწორედ ამ დამოკიდებულების გამოხატულება იყო გუშინდელი ფაქტი, შესაბამისი პირების დაკავება. როდესაც ვხედავთ სამართალდარღვევას, იქ აუცილებელია სახელმწიფოს რეაგირება“, - განაცხადა პრემიერმა.
ცნობისთვის, გუშინ გენერალურმა პროკურატურამ განაცხადა, რომ 2024 წლის საპროტესტო აქციების მიმდინარეობისას მომიტინგე ზვიად მაისაშვილის, პოლიტიკოს ლევან ხაბეიშვილისა და ჟურნალისტ გურამ როგავას მიმართ განხორციელებული ფიზიკური ძალადობის ფაქტზე 5 პირი დააკავა. როგორც გენერალურმა პროკურორმა, გიორგი გვარაკიძემ საგანგებო ბრიფინგზე განაცხადა, დაკავებულთა შორის სამი ყოფილი და ერთი მოქმედი სპეცრაზმელია.