კონკურენცია იმდენად მაღალია, რომ საწვავზე არაადეკვატური ფასი ვერ იმუშავებს - ვასილ ხორავა

ნავთობპროდუქტების ბაზარზე არსებული მაღალი კონკურენცია კომპანიებს არაობიექტური ფასების დაწესების საშუალებას არ აძლევს - ამის შესახებ BMG-სთან „ვისოლ ჯგუფის“ გენერალური დირექტორი ვასილ ხორავა აცხადებს. მისი თქმით, ბაზარი თავად არეგულირებს პროცესებს და ნებისმიერი არასწორი საფასო პოლიტიკა, პირველ რიგში, თავად იმპორტიორს აზარალებს.

როგორც ვასილ ხორავა აღნიშნავს, საწვავის ბაზარზე მომხმარებლისთვის ბრძოლა იმდენად დიდია, რომ ფასნამატის თვითნებური ზრდა პრაქტიკულად შეუძლებელია.

„ბაზარზე იმდენად მაღალია კონკურენცია, რომ თუ ვინმე არაობიექტურ ფასს დაადებს, ის უბრალოდ ვერ გაყიდის პროდუქტს. კონკურენცია ამას ყველაფერს არეგულირებს იმ თვალსაზრისით, რომ არაადეკვატური ფასი ბაზარზე ვერ იმუშავებს. ძალიან ბევრი იმპორტიორია და ვინმე თუ არასწორად მოიქცევა, თავისი არასწორი ფასით თვითონვე დაისჯება“, - აცხადებს ხორავა BMG-სთან.

მისივე თქმით, კომპანიის პასუხისმგებლობაა, ფასების სტაბილურობის შენარჩუნებას მაქსიმალურად ეცადოს, თუმცა საოპერაციო ხარჯებისა და მოგებიანობის გათვალისწინებით, ფასნამატი გარდაუვალია.

„თუ გამოუვალი სიტუაციაა და კომპანიისთვის საოპერაციო ხარჯებისა და მოგებიანობის შესანარჩუნებლად საჭიროა ფასნამატი, ის უნდა გავაკეთოთ, მეტი არაფერი. სამწუხაროდ, ჩვენ ვერაფერს შევცვლით. ჩვენ უნდა მივყვეთ ამას თანმიმდევრულად, პასუხისმგებლობით და პატიოსნად, რომ ეს თემა არავინ გამოიყენოს. მაგრამ ვერ გამოიყენებს, იმიტომ რომ ბაზარზე კონკურენცია იმდენად მაღალია, რომ თუ ვინმე არაობიექტურ ფასს დაადებს, ის პროდუქტს უბრალოდ ვერ გაყიდის“, - აცხადებს ვასილ ხორავა.

მისივე თქმით, „ვისოლმა“ ბოლო პერიოდში საწვავზე ფასების მკვეთრი ნახტომის თავიდან აცილება ძველი მარაგებისა და ახალი იმპორტის დაბალანსებით მოახერხა. „შეწონილ ფასმა“ კი, კომპანიას საშუალება მისცა, საერთაშორისო ბაზარზე არსებული რყევების ფონზე, მომხმარებლისთვის შედარებით დაბალი ფასი შეეთავაზებინა.