კონკურენციის სააგენტომ 78 მომხმარებლის საჩივრის საფუძველზე „ისურვეს“ უსამართლო კომერციული საქმიანობის ფაქტი დაუდგინა

კონკურენციისა და მომხმარებლის დაცვის სააგენტომ (GCCA) შპს „ისურვეს“ (isurve.ge) მიერ უსამართლო კომერციული საქმიანობის განხორციელების ფაქტი დაადასტურა. სააგენტომ გადაწყვეტილება 78 მომხმარებლის კოლექტიური საჩივრის შესწავლის საფუძველზე მიიღო.

GCCA-ის ინფორმაციით, საქმის წარმოების პროცესში გამოიკვეთა, რომ მოვაჭრე სისტემატურად არღვევდა მომხმარებლის უფლებებს რამდენიმე მიმართულებით:

• მიწოდების ვადები: კომპანია არღვევდა შეძენილი ნივთების მიწოდების დათქმულ ვადებს; • თანხის დაბრუნება: შეკვეთის გაუქმების შემთხვევაში, მომხმარებლებს გადახდილი თანხა „არაგონივრული ვადის“ დაგვიანებით უბრუნდებოდათ; • პირობების დარღვევა: დარღვევები დაფიქსირდა ხელშეკრულებით გათვალისწინებული საქონლის მიწოდების ნაწილშიც.

სააგენტომ კომპანიის ქმედება შეაფასა, როგორც შეცდომაში შემყვანი კომერციული საქმიანობა, რაც ეწინააღმდეგება კეთილსინდისიერი ვაჭრობის პრინციპებს.

აღნიშნული გადაწყვეტილებით, სააგენტომ დაადგინა პრეცედენტიც: შეკვეთის გაუქმების შემდეგ, მოვაჭრემ მომხმარებელს თანხა მაქსიმუმ 14 კალენდარულ დღეში უნდა დაუბრუნოს. ამ ვადის გადაცილება არაგონივრულად ჩაითვლება.

სააგენტოს მოთხოვნები კომპანიის მიმართ:

• 1 თვის ვადაში აღადგინოს მომხმარებელთა დარღვეული უფლებები; • სავაჭრო პოლიტიკა შესაბამისობაში მოიყვანოს კანონმდებლობასთან.

თუ კომპანია დადგენილ ვადაში არ აღმოფხვრის დარღვევებს, მას დაეკისრება ჯარიმა, რომელიც მისი წინა ფინანსური წლის ბრუნვის 2%-მდე შეიძლება იყოს. დარღვევის განმეორების შემთხვევაში კი, ჯარიმის ოდენობა ორმაგდება.