კონტრაქტორებთან მკაცრი საუბარი გვქონდა... შეუძლებელია პროექტები წლობით გაგრძელდეს - მინისტრი აბასთუმანზე

"კონტრაქტორებთან გვქონდა მკაცრი საუბარი. თითოეულ კომპანიას განესაზღვრა კონკრეტული ვადა, თუ როდის და რა ეტაპზე უნდა დასრულდეს სამუშაოები. შეუძლებელია პროექტები წლობით გაგრძელდეს - სამუშაოები უნდა შესრულდეს ხარისხიანად და ხელშეკრულებით განსაზღვრულ ვადებში“, - განაცხადა ინფრასტრუქტურის მინისტრმა რევაზ სოხაძემ აბასთუმნის რეაბილიტაციის პროექტთან დაკავშირებით.

სახელმწიფოს ადგილზე ₾300 მილიონზე მსხვილი კონტრაქტები აქვს გაფორმებული, მათ შორის 2026 წლის გაზაფხულზე გაფორმდა 70-მილიონიანი 2-წლიანი ხელშეკრულება აბასთუმნის ისტორიული ნაწილის იერსახის გაუმჯობესებაზე. ხოლო ის პროექტები, რომლებიც ზოგიერთ შემთხვევაში პანდემიამდეც კი დაიწყო ნელი ტემპებით ვითარდება. მაგალითად, მხოლოდ ახლა დასრულდა ₾12.5-მილიონიანი 700 ავტომობილზე გათვლილი პარკინგის მოწყობა, რომლის სამშენებლო კონტრაქტიც თავდაპირველად 2019 წლის ივლისში გაფორმდა და 2021 წლის დეკემბერში უნდა დასრულებულიყო. ამასთან, სამინისტროს თანახმად, შესრულებული სამუშაოების ხარისხი გაუმჯობესებას საჭიროებს. როგორც მინისტრი აღნიშნავს, მნიშვნელოვანი ვადაგადაცილებებია აბასთუმნის შემოვლითი გზის მშენებლობის მიმართულებითაც.

ინფრასტრუქტურის სამინისტროს მიერ აბასთუმანში გასულ წლებში არაერთი მნიშვნელოვანი პროექტი განხორციელდა. ამ ეტაპზე მიმდინარეობს ბაღდათი-აბასთუმნის გზის სრული რეაბილიტაცია და აბასთუმნის შემოვლითი გზის მშენებლობა, რომლის ფარგლებში უკვე აშენებულია ხიდები და გვირაბი. პარალელურად მიმდინარეობს ქუთაისი-ბაღდათი-აბასთუმანი-ბენარას გზის მონაკვეთის რეაბილიტაცია, ასათიანის ქუჩის განახლება და იგეგმება საცხოვრებელი სახლების ფასადების რეაბილიტაციაც.