ლაშა ხუციშვილი IMF-ის შესაძლებლობების განვითარების რეგიონული ცენტრი დირექტორს შეხვდა

ფინანსთა მინისტრმა, ლაშა ხუციშვილმა საერთაშორისო სავალუტო ფონდის (IMF) კავკასიის, ცენტრალური აზიისა და მონღოლეთის რეგიონული შესაძლებლობების განვითარების ცენტრის (CCAMTAC) დირექტორთან, ჰოლგერ ფლორკემეიერთან გაცნობითი ხასიათის შეხვედრა გამართა.

სამინისტროს ცნობით, მხარეებმა განიხილეს ტექნიკური თანამშრომლობის მიმდინარე და დაგეგმილი პროექტები მაკროეკონომიკური სტაბილურობის, ფისკალური პოლიტიკის და მათთან დაკავშირებული ინსტიტუციური შესაძლებლობების გაძლიერების მიმართულებით.

"ასევე, ხაზი გაესვა ფინანსთა სამინისტროს როლს, აღნიშნული მიმართულებით რეგიონული თანამშრომლობის პროექტებში.

შეხვედრას დაესწრნენ ფინანსთა მინისტრის მოადგილეები გიორგი კაკაურიძე, ეკატერინე გუნცაძე და ცოტნე ყავლაშვილი, ასევე, სსფ-ის მუდმივი წარმომადგენელი საქართველოში ენდრიუ ჯუველი",- აღნიშნულია ინფორმაციაში.

CCAMTAC წარმოადგენს IMF-ისა და ცხრა წევრი ქვეყნის (აზერბაიჯანი, სომხეთი, საქართველო, ყაზახეთი, ყირგიზეთი, მონღოლეთი, ტაჯიკეთი, თურქმენეთი და უზბეკეთი) ერთობლივ პროექტს. ცენტრმა მუშაობა 2021 წელს დაიწყო. ძირითადი საქმიანობა რეგიონის ეკონომიკური პოტენციალის განვითარებისკენაა მიმართული.