ლატვია და ლიეტუვა რუსული მარცვლეულის ტრანზიტის დაბლოკვას გეგმავენ
ლატვია და ლიეტუვა საკუთარი პორტების გავლით რუსული მარცვლეულის ექსპორტის დაბლოკვას ოფიციალურად გეგმავენ. ორი სახელმწიფოს წარმომადგენლები ამჟამად მოლაპარაკებებს აქტიურად აწარმოებენ.
ბალტიისპირეთის ქვეყნების ეს ინიციატივა რუსულ საპორტო ინფრასტრუქტურაზე უკრაინული დრონებით მიტანილი იერიშების შემდეგ ტვირთბრუნვის მკვეთრმა ზრდამ განაპირობა.
სააგენტო Reuters-ის მიერ გავრცელებული ცნობებით, ორივე სახელმწიფოს მაღალჩინოსნები მზად არიან, სატრანზიტო მარშრუტების დაუყოვნებლივ ჩაკეტონ.
ორ პოსტსაბჭოთა სახელმწიფოს შორის საკითხის გადაწყვეტას განსაკუთრებულად მხარს ლატვიური მხარე უჭერს. მისი მთავრობა საკუთარ ტერიტორიაზე რუსული მარცვლეულის ტრანზიტის სრულ აკრძალვას უახლოეს დღეებში განიხილავს.
რაც შეეხება ლიეტუვას, ოფიციალურ ვილნიუსს კონკრეტული სამართლებრივი ნაბიჯები ჯერ არ დაუგეგმავს, თუმცა ლიეტუვის პრემიერ-მინისტრი ხაზგასმით აღნიშნავს, რომ ადგილობრივი ინფრასტრუქტურის რუსული მარცვლეულის ექსპორტისთვის გამოყენება ქვეყნის ღირებულებებს ეწინააღმდეგება.
ამასთან, მთავრობის მეთაურმა განმარტა, რომ დაგეგმილი ზომები რუსეთის ძირითად ტერიტორიასა და კალინინგრადის ექსკლავს შორის სახმელეთო ტრანზიტს არ შეეხება.
ცნობისთვის, რუსმა ექსპორტიორებმა მარცვლეულის ნაკადების შავი და აზოვის ზღვებიდან ბალტიისპირეთისკენ გადამისამართება რამდენიმე კვირის წინ, იძულებით დაიწყეს, რადგან უკრაინულმა იერიშებმა რეგიონში რუსეთის საზღვაო ლოგისტიკას, საპორტო ინფრასტრუქტურასა და სატვირთო ხომალდებს მნიშვნელოვანი დარტყმა მიაყენა.
BM.GE
წყარო: bm.ge