ლიეტუვის ჯარის ყოფილი მეთაური, კბილის იმპლანტის სახელმწიფო ბიუჯეტიდან დაფინანსების გამო, 20 000 ევროთი დააჯარიმეს

ვილნიუსის სასამართლომ ლიეტუვის შეიარაღებული ძალების ყოფილ მეთაურს, ვალდემარას რუპშისს თაღლითობის, სამსახურებრივი უფლებამოსილების ბოროტად გამოყენებისა და დოკუმენტების გაყალბებისთვის 20 000 ევროს ოდენობით ჯარიმა დააკისრა.

რუპშისს ბრალად ედებოდა სამხედრო სახსრების გამოყენება ორი კბილის იმპლანტის საფასურის გადასახდელად, რომლის ღირებულებამაც თითქმის 4 000 ევრო შეადგინა. თავად რუპშისი მანამდე აცხადებდა, რომ კბილის ტრავმა 2022 წლის ივლისში, გერმანიაში ლიეტუველი სამხედროების მონახულებისას მიიღო. შესამაბისად, აღნიშნული შემთხვევა ოფიციალურად სამსახურებრივ მოვალეობასთან დაკავშირებულად იქნა მიჩნეული, რის გამოც მკურნალობის ხარჯები ეროვნული თავდაცვის ფონდებიდან დაიფარა.

აღსანიშნავია, რომ სასამართლოს გადაწყვეტილებით, რუპშისს ასევე ხუთი წლის ვადით აეკრძალა საჯარო სამსახურში მუშაობა. იგი შეიარაღებული ძალების მეთაურის თანამდებობას 2019 წლიდან 2024 წლამდე იკავებდა. ყოფილი მაღალჩინოსანი განაჩენის გამოცხადებას არ დასწრებია.

ამავე საქმეზე 15 000 ევროს ოდენობის ჯარიმა დაეკისრა სამხედრო მედიკოს შარუნას რატკუსს, რომელსაც ბრალად დოკუმენტების გაყალბება და რუპშისის ხელშეწყობა ედებოდა. რატკუსმა განაცხადა, რომ სასამართლოს გადაწყვეტილების გასაჩივრებას აპირებს.