ლიონელ მესიმ ესპანეთის მეორე დივიზიონის კლუბ „ელდენსეს“ შეძენაზე პრინციპულ შეთანხმებას მიაღწია

„ინტერ მაიამის“ ვარსკვლავი, ლეო მესი ესპანური კლუბის "ელდენსეს" 100%-ის შეძენას გეგმავს და ამჟამად კომპანიის ფინანსური და იურიდიული შემოწმების პროცესი მიმდინარეობს. გარიგება ჯერ საბოლოოდ გაფორმებული არ არის და ესპანეთის სპორტის უმაღლესი საბჭოს ავტორიზაციას საჭიროებს, თუმცა შეთანხმება უკვე მიღწეულია.

გარიგების განხორციელების შემთხვევაში, მესი ძველ მეტოქე კრიშტიანუ რონალდუს ბიზნესშიც დაუპირისპირდება. მადრიდის „რეალის“ ლეგენდამ თებერვალში საუდის არაბეთის მფლობელობაში მყოფ „ალმერიას“ 25%-იანი წილი შეიძინა. „ალმერია“ სწორედ იმავე დივიზიონში თამაშობს.

ეს მესის მიერ ესპანურ ფეხბურთში განხორციელებული მეორე საინვესტიციო ნაბიჯი იქნება. აპრილში არგენტინელმა მეხუთე დივიზიონის კლუბი, UE „კორნელია“ შეიძინა. გუნდი ბარსელონიდან სამხრეთ-დასავლეთით, დაახლოებით 20 წუთის სავალზე მდებარეობს.

„ელდენსეს“, კლუბი ვალენსიის ავტონომიური რეგიონის ქალაქ ელდაშია დაფუძნებული. გუნდი ესპანეთის მეორე დივიზიონში თამაშობს, მას შემდეგ, რაც გასულ სეზონში „პრიმერა ფედერაციიდან“ დაწინაურდა.