მამუკა მდინარაძის მინისტრის აპარატს ცალკე შტატი არ ექნება და საშტატო მხარდაჭერას მთავრობის ადმინისტრაცია გაუწევს - კანონპროექტი
მთავრობამ პარლამენტს განსახილველად გაუგზავნა კანონპროექტი, რომლითაც იქმნება სახელმწიფო მინისტრის თანამდებობა სამართალდამცავი ორგანოების კოორდინაციის საკითხებში. კანონპროექტის განმარტებითი ბარათიდან ირკვევა, რომ უწყება მთავრობის ადმინისტრაციის შენობაში განთავსდება და მას ცალკე გამოყოფილი შტატი არ ეყოლება, უწყების საკადრო უზრუნველყოფაზე პასუხისმგებელი მთავრობის ადმინისტრაცია იქნება და ამ მხრივ ახალ შტატებს მთავრობა არ დაიქირავებს. ამასთან, უწყების დაფინანსებაც სრულად მთავრობის ადმინისტრაციის 2026 წლის ბიუჯეტიდან მოხდება.
"კანონპროექტის მიღება იქონიებს გავლენას სახელმწიფო ბიუჯეტის ხარჯვით ნაწილზე იმ თვალსაზრისით, რომ იქმნება ახალი - სამართალდამცავი ორგანოების კოორდინაციის საკითხებში საქართველოს სახელმწიფო მინისტრის თანამდებობა და შესაბამისად, „საჯარო დაწესებულებაში შრომის ანაზღაურების შესახებ“ საქართველოს კანონით განსაზღვრული წესით მოხდება მისი შრომის ანაზღაურება, ხოლო რაც შეეხება სამართალდამცავი ორგანოების კოორდინაციის საკითხებში საქართველოს სახელმწიფო მინისტრის საქმიანობას, იგი საქართველოს მთავრობის ადმინისტრაციისათვის წლიური საბიუჯეტო კანონით განსაზღვრული ასიგნებებიდან იქნება უზრუნველყოფილი.
კანონპროექტის მიღება სახელმწიფო ბიუჯეტის საშემოსავლო ნაწილზე იმ თვალსაზრისით არ იქონიებს გავლენას, რომ საქართველოს სახელმწიფო მინისტრს სამართალდამცავი ორგანოების კოორდინაციის საკითხებში აპარატულ მხარდაჭერას საქართველოს მთავრობის ადმინისტრაცია გაუწევს", - ნათქვამია განმარტებით ბარათში.
აღნიშნული უწყების დაფუძნების ინიციატივით პრემიერ-მინისტრი ირაკლი კობახიძე 21 აპრილს გამოვიდა, იმავე დღეს როდესაც მამუკა მდინარაძე სახელმწიფო უსაფრთხოების სამსახურის (სუს) უფროსის თანამდებობიდან გაათავისუფლა. აღნიშნულ თანამდებობაზე შს მინისტრი გელა გელაძე გადაინაცვლებს, ხოლო შს მინისტრის პოსტი კი აჭარის მთავრობის ყოფილმა უფროსმა სულხან თამაზაშვილმა დაიკავა.