მარიამ ქვრივიშვილის თქმით, ანაკლიის პორტი პირველ გემს 2032 წელს მიიღებს|აქამდე 2029 წელი სახელდებოდა
განახლება|00:55 საათზე: BMG-ის ეკონომიკის სამინისტროს პრესსამსახურიდან დაუკავშირდნენ და უთხრეს, რომ ადგილი ჰქონდა მექანიკურ შეცდომას და ანაკლიის პორტის ამოქმედების თარიღად ისევ 2029 წელი რჩება.
ეკონომიკისა და მდგრადი განვითარების მინისტრის მარიამ ქვრივიშვილის თქმით, ანაკლიის ღრმაწყლოვანი პორტი პირველ ტვირთს 2032 წელს მიიღებს.
აღსანიშნავია, რომ 2025 წლის ბოლოს ეკონომიკის მინისტრიც და მისი მოადგილე თამარ იოსელიანიც აცხადებდნენ, რომ ანაკლიაში პირველი გემი 2029 წელს შემოვიდოდა და პორტი ტვირთების დამუშავებას დაიწყებდა. პორტის ამოქმედების თარიღის შეცვლის შესახებ მარიამ ქვრივიშვილს არც რამდენიმე კვირის წინ, ანაკლიაში ვიზიტის დროს უსაუბრია.
ეკონომიკის მინისტრს ანაკლიის პორტში პირველი გემის მიღების თარიღის შეცვლის მიზეზი არ დაუკონკრეტებია.
"გვაქვს მიმდინარე მოლაპარაკებები ჩინურ კონსორციუმთან და ოპტიმისტურად ვართ განწყობილი, რომ აღნიშნული მოლაპარაკება წარმატებით დასრულდება. არსებული გეგმა გრაფიკის მიხედვით, რომელსაც მივყვებით, 2032 წელს ანაკლიის ღრმაწყლოვანმა პორტმა პირველი ტვირთის მიღება უნდა შეძლოს", - განაცხადა მარიამ ქვრივიშვილმა „იმედი LIVE“-ში სტუმრობისას.
მარიამ ქვრივიშვილმა ასევე თქვა, რომ მოხდა პროექტის ფინანსური ოპტიმიზაცია და პროექტი 55 მილიონი დოლარით გაიაფდა.
"გასული თვეების განმავლობაში ჩვენ ძალიან დიდი სამუშაო გავწიეთ კონტრაქტორთან ერთად, რომ პროექტის ფინანსური ოპტიმიზაცია მომხდარიყო და 55 მილიონი დოლარით გაიაფდა პროექტი ოღონდ არა პროექტის ოპტიმიზაციის ან სამშენებლო კომპონენტების შემცირების ხარჯზე. პროექტი არის უცვლელი, მოხდა ფინანსური კომპონენტების ოპტიმიზაცია და სწორედ აღნიშნული ოპტიმიზაცია მოგვცემს რომ იგივე დროში უფრო მეტი ინფრასტრუქტურის მოწყობა შევძლოთ ანაკლიაში. ანაკლიაში დაიწყო აქტიური სამშენებლო სამუშაოები. ყველაფერი გეგმა გრაფიკის მიხედვით მიმდინარეობს", - განაცხადა ქვრივიშვილმა.
BMG ეკონომიკის სამინისტროს მიმართავს კითხვით, რა მიზეზით გადაიწია ანაკლიის პორტის ამოქმედების ვადამ და პასუხს მიღებისთანავე გაგაცნობთ.
BM.GE
წყარო: bm.ge