Marvel-მა Ghost Rider-ისა და Black Panther 3-ის გამოშვება ოფიციალურად დააანონსა
Marvel Studios-მა შაბათს სან-დიეგოს Comic-Con-ზე მომავალი წლების პროექტები წარადგინა. სტუდიამ ოფიციალურად დააანონსა Ghost Rider, რომელშიც მთავარ როლს რაიან გოსლინგი შეასრულებს, ხოლო რეჟისორი შონ ლევი იქნება. ასევე გამოცხადდა Black Panther 3 გამოშვება.
Black Panther 3 2028 წლის 15 დეკემბერს გამოვა. ფილმში დევიდ ჯონსონი ახალ ტ'ჩალას განასახიერებს - წინა "შავი პანტერას" ვაჟს, როლსაც გარდაცვლილი ჩედვიკ ბოუზმენი ასრულებდა.
Ghost Rider ასევე 2028 წელს გამოვა, თუმცა პრემიერის ზუსტი თარიღი ჯერ არ დასახელებულა.
პანელზე მაყურებელს პირველად უჩვენეს კადრები Marvel-ის მომდევნო მასშტაბური პროექტიდან - Avengers: Doomsday, რომელიც კინოთეატრებში Spider-Man: Brand New Day-ის შემდეგ გამოვა.
Marvel-ის ფილმებმა მსოფლიო კინოგაქირავებაში დღემდე 33 მილიარდ დოლარამდე შემოსავალი მოიტანეს, რაც ნებისმიერი კინოფრენჩაიზისთვის რეკორდული მაჩვენებელია.
2019 წელს გამოსული Avengers: Endgame დღემდე ყველა დროის მეორე ყველაზე შემოსავლიანი ფილმია.
Avengers: Doomsday კინოთეატრებში 2026 წლის 18 დეკემბერს გამოვა. იმავე დღეს Warner Bros-ის სამეცნიერო-ფანტასტიკური ფრენჩაიზის მესამე ნაწილი Dune გამოვა, რის გამოც ანალიტიკოსებმა მომავალ სალაროების დაპირისპირებას უკვე Dunesday უწოდეს.
Doomsday-ის შემდეგ Marvel-ის შემდეგი მასშტაბური ფილმი Avengers: Secret Wars იქნება, რომლის პრემიერაც 2027 წლის დეკემბერში იგეგმება.
ასევე ცნობილი გახდა, რომ 2026 წლის 14-16 აგვისტოს კალიფორნიის ქალაქ ანაჰაიმში გაიმართება D23 - Disney-ის მასშტაბური კონვენცია, სადაც კომპანია საკუთარ ახალ პროექტებს წარადგენს. Marvel Studios-ს ღონისძიებაზე ერთ-ერთი მთავარი ადგილი დაეთმობა.