მესამე კვარტალში BlackRock-ის მოგება $1.66 მილიარდამდე გაიზარდა

მსოფლიოს უმსხვილესმა აქტივების მმართველმა კომპანია BlackRock-მა მესამე კვარტალში ფონდების მართვიდან მიღებული საკომისიოების ზრდის ხარჯზე მოგება მნიშვნელოვნად გაზარდა. როგორც ირკვევა, სექტემბრის ბოლოს დასრულებულ საანგარიშო პერიოდში თითო აქციაზე მიღებულმა მოგებამ $10.57 შეადგინა, მაშინ როცა ერთი წლის წინ ეს მაჩვენებელი $8.43 იყო.

ამასთან, თუ გასული წლის ანალოგიურ პერიოდში კომპანიამ $1.32 მილიარდის წმინდა მოგება მიიღო, ამჯერად მაჩვენებელმა $1.66 მილიარდი შეადგინა. აღსანიშნავია ისიც, რომ BlackRock-ის მართვის ქვეშ არსებული აქტივების მოცულობა წლიურ ჭრილში $13.46 ტრილიონიდან $15.49 ტრილიონამდე გაიზარდა. მნიშვნელოვანია ითქვას, რომ ეს ზრდა საფონდო ბირჟაზე ინვესტიციების ღირებულების მატებამ და კომპანიის წამყვან iShares-ის ფონდებში $134.5 მილიარდის მოცულობის ახალი კაპიტალის შემოდინებამ განაპირობა.

რაც შეეხება ცალკეულ მიმართულებებს, სახაზინო ობლიგაციების ბაზარზე არსებული მკვეთრი გაყიდვების მიუხედავად, BlackRock-ის სავალო პროდუქტებში წმინდა ფულადმა ნაკადებმა $78.2 მილიარდს მიაღწია. ეს მაჩვენებელი კი ინვესტორთა მხრიდან მაღალ მოთხოვნაზე მიუთითებს.

არსებული შედეგების გასაჯაროების პარალელურად, კომპანიამ სამომავლო გეგმებიც წარადგინა. კერძოდ, BlackRock-ი ათწლეულის ბოლომდე შემოსავლის $35 მილიარდამდე გაზრდას ისახავს მიზნად. აქტივების მმართველი გიგანტი ამ თანხის 30%-ზე მეტის მიღებას კერძო ბაზრებისა და ტექნოლოგიური სექტორის დახმარებით გეგმავს.