Meta-მ თანამშრომლების გათავისუფლების პროცესი დაიწყო

ტექნოლოგიურმა გიგანტმა Meta-მ 8 000-მდე თანამშრომლის დათხოვნის შესახებ შეტყობინებების გაგზავნა დაიწყო, რაც ეფექტიანობის გაზრდისა და ხარჯების შემცირებისკენ მიმართული რესტრუქტურიზაციის ნაწილია.

კომპანიამ პროცესი ოთხშაბათს დილით, სინგაპურში დასაქმებული კადრებით გახსნა, სადაც მუშაკებმა შეტყობინებები ადგილობრივი დროით დილის 4 საათზე მიიღეს. შიდა მემორანდუმის თანახმად, ევროპასა და აშშ-ში მომუშავე პერსონალი ინფორმაციას საკუთარი სასაათო სარტყლების მიხედვით მიიღებს, პროცესის მიმდინარეობისას კი ხელმძღვანელობამ თანამშრომლებს სახლიდან მუშაობისკენ მოუწოდა.

როგორც ირკვევა, შემცირებების ეს ტალღა განსაკუთრებით საინჟინრო და პროდუქტების განვითარების გუნდებს შეეხება, წლის ბოლომდე კი შესაძლოა კადრების დამატებითი ოპტიმიზაციაც განხორციელდეს. პარალელურად, Meta-მ 7 000-მდე თანამშრომელი ახლად შექმნილ გუნდებში გადაანაწილა, რომელთა საქმიანობაც ხელოვნური ინტელექტის ინიციატივებზე, მათ შორის ახალი პროდუქტებისა და აგენტების შექმნაზეა ფოკუსირებული.

მნიშვნელოვანია ითქვას, რომ აღმასრულებელი დირექტორის, მარკ ცუკერბერგის გადაწყვეტილებით, ხელოვნური ინტელექტი კომპანიის მთავარ პრიორიტეტად იქცა, რათა Meta Google-სა და OpenAI-ს კონკურენციაში არ ჩამორჩეს. აღნიშნულმა სტრატეგიამ თანამშრომლებში უკმაყოფილება და შფოთვა გამოიწვია.