Meta-ს ევროკავშირისთვის წლიური გლობალური ბრუნვის 6%-ის გადახდა შეიძლება მოუწიოს - რაში ედება ბრალი კომპანიას?

ევროკომისიამ დაადგინა, რომ Facebook-ის, Instagram-ის მფლობელი ამერიკული ტექნოლოგიური გიგანტი Meta ციფრული მომსახურების შესახებ ევროპულ კანონს არღვევს.

უწყების წინასწარი გამოძიების თანახმად, ტექნოლოგიური გიგანტი სოციალურ ქსელებზე 13 წლამდე ასაკის მომხმარებელთა წვდომის ეფექტურ შეზღუდვას ვერ უზრუნველყოფს.

როგორც ირკვევა, არასრულწლოვნებს რეგისტრაციისას ყალბი მონაცემების მითითება ყოველგვარი გადამოწმების გარეშე შეუძლიათ. კომისიის შეფასებით, პლატფორმებმა რისკების შეფასების მეთოდოლოგია სრულად უნდა შეცვალონ.

გამოძიებამ დაადგინა, რომ არასრულწლოვანთა ანგარიშების შესახებ Meta-სთვის ინფორმაციის მიწოდების პროცესი მეტისმეტადაა გართულებული. მომხმარებელს საჩივრის ფორმის შესავსებად შვიდი სხვადასხვა მოქმედების შესრულება უწევს. ამასთან, Meta-ს მხრიდან უკვე იდენტიფიცირებულ დარღვევებზე შესაბამისი რეაგირება იშვიათად ხდება. აღსანიშნავია, რომ მას შემდეგ, რაც საბოლოო ინსპექტირება დასრულდება, ბრალდების დადასტურების შემთხვევაში, კომპანიას წლიური გლობალური ბრუნვის 6%-მდე ოდენობის ჯარიმის გადახდა მოუწევს.

მნიშვნელოვანია ითქვას, რომ Meta-ს წარმომადგენლები წინასწარი გამოძიების შედეგებს არ ეთანხმებიან. მათი განცხადებით, ასაკის დადგენა არამარტო მათთვის, არამედ მთლიანად სოციალური მედიების ინდუსტრიისთვის რთული პროცესია. კომპანია პირობას დებს, რომ არსებული პრობლემის მოსაგვარებლად ტექნოლოგიურ ინვესტიციებს გაზრდის.