მიწოდების დრო გაორმაგდა, სერვისი გაძვირდა - Glovo უცხოელი კურიერების აკრძალვის შედეგებზე
საკვების მიტანის კომპანია Glovo-მ მიმდინარე წლის 1 მარტიდან პარტნიორი კურიერების 7% დაკარგა და კადრების დეფიციტი შეექმნა, საკურიერო ბაზარმა კი ჯამურად სამუშაო ძალის 20-30% დაკარგა - ამის შესახებ BM.GE-ს გლოვოს რეგიონული ოფისიდან განუცხადეს.
საქმე ისაა, რომ 2026 წლის 1 მარტიდან საქართველოს მთავრობამ უცხოეთის მოქალაქეებს კურიერებად, ტაქსის მძღოლებად და გიდებად დასაქმება აუკრძალა. "შრომითი მიგრაციის შესახებ" კანონში შესული ცვლილებით, ამ საქმიანობებზე ნულოვანი კვოტა დაწესდა, რის შედეგადაც, "შრომითი საქმიანობის უფლება", რომლებიც უცხოელების სხვა პოზიციებზე დასაქმებისთვის გაიცემა, კურიერების, ტაქსის მძღოლებისა და გიდებისთვის დაშვებული საერთოდ არ არის.
"ახალი კანონმდებლობის ძალაში შესვლამდე, უცხოელი კურიერები საქართველოში ჩვენი მთლიანი პარკის დაახლოებით 7%-ს შეადგენდნენ. ახალ სამართლებრივ მოთხოვნებთან სრული შესაბამისობის უზრუნველსაყოფად, 1 მარტიდან ასეთი ანგარიშების 100%-ის დეაქტივაცია მოვახდინეთ. თუ სწრაფი მიტანის სექტორს მთლიანობაში შევხედავთ, გავლენა კიდევ უფრო მასშტაბურია: ჩვენი შეფასებით, ბაზარმა კურიერების მთლიანი რესურსის 20%-დან 30%-მდე დაკარგა, რამაც მიწოდების დეფიციტი შექმნა", - გვეუბნებიან Glovo-ში.
როგორც Glovo-დან გვითხრეს, აღნიშნულმა დეფიციტმა გავლენა მიწოდების ფასებსა და დროზეც იქონია. კერძოდ, ეროვნულ დონეზე მიწოდების საშუალო ვადა 35-დან 55 წუთამდე გახანგრძლივდა.
"ბაზარზე კურიერების მწვავე დეფიციტის გამო, ჩვენ დამატებითი მოთხოვნის სტიმულირებას ვერ ვახდენთ, რადგან ამ ეტაპზე შეკვეთების საიმედოდ შესასრულებლად საკმარისი რესურსი არ გაგვაჩნია. შესაბამისად, საბოლოო მომხმარებლისთვის სერვისი უფრო ძვირია, ვიდრე ეს კურიერების ადეკვატური რაოდენობის პირობებში იქნებოდა. ამავდროულად, კომპანია იღებს მნიშვნელოვან დამატებით ხარჯებს არსებული კურიერების შესანარჩუნებლად და ახლების მოსაზიდად.
[დეფიციტი] აშკარად აისახა მიტანის სავარაუდო დროზეც: თუ ადრე ქვეყნის მასშტაბით საშუალო მაჩვენებელი 25–35 წუთს შეადგენდა, ახლა ის 45–55 წუთამდე გაიზარდა. ეს ტენდენცია განსაკუთრებით შესამჩნევია პიკის საათებსა და არახელსაყრელი ამინდის პირობებში", - ამბობენ Glovo-ში.
