მივმართავ მარიამ ქვრივიშვილს-არ მუშაობს მთის ტრასების სააგენტო და დასაკეტია|მირანდა ესაკიას არგუმენტები

გუდაურის ბიზნეს ასოციაციის თანადამფუძნებელ მირანდა ესაკიას განცხადებით, „მთის ტრასების სააგენტო [MTA] უნდა გაუქმდეს, რადგან პარაზიტი კომპანია და სახელმწიფო თანხებს ჭამს“.

ამის შესახებ მან BMGTV-ის გადაცემა “წერტილში” განაცხადა, საიდანაც ეკონომიკისა და მდგრადი განვითარების მინისტრ მარიამ ქვრივიშვილსაც მიმართა.

„მივმართავ მარიამ ქვრივიშვილს - არ მუშაობს მთის ტრასების სააგენტო და დასაკეტია! ეს არის პარაზიტი კომპანია, რომელიც სახელმწიფო თანხებს ჭამს. ჩვენ გვჭირდება მენეჯმენტის ახალი მოდელი, რომელიც იქნება ეფექტიანი, მთის კურორტების განვითარებას შეუწყობს ხელს და ქვეყანას დამატებით შემოსავალს მოუტანს“, - აცხადებს გუდაურის ბიზნეს ასოციაციის თანადამფუძნებელი.

"მთის ტრასების სააგენტო" საქართველოს ეკონომიკისა და მდგრადი განვითარების სამინისტროს სსიპ სახელმწიფო ქონების ეროვნული სააგენტოს მიერ დაფუძნებული სსიპ-ია. MTA მართავს სამთო-სათხილამურო არეალებს საქართველოს 4 მთის კურორტზე: გუდაურში, ბაკურიანში, მესტიასა და გოდერძიზე. „მთის ტრასების სააგენტოს“ ამჟამად ირაკლი ბურჭულაძე ხელმძღვანელობს.

გუდაურის ბიზნეს ასოციაცია, რომელიც მირანდა ესაკიას ინფორმაციით, გუდაურში არსებული ბიზნესსუბიექტების 70%-ს აერთიანებს, MTA-ს საქმიანობით უკმაყოფილოა.

მირანდა ესაკია გუდაურში მდებარე რესტორან „მთვრალი ალუბალის“ დამფუძნებელიცაა, უკვე წლებია, "მთის ტრასების სააგენტოს" (MTA) საქმიანობას მკაცრად აკრიტიკებს. ამჟამად, ბიზნესსექტორის უკმაყოფილების მთავარი მიზეზი სსიპ-ის გაუმჭვირვალე ფინანსური მენეჯმენტი, არაეფექტიანი საქმიანობა და 2025-26 წლების სეზონის ნაადრევი დახურვაა, როცა გუდაურში თოვლია.

მირანდა ესაკიას თქმით, მაშინ როდესაც გუდაურში აპრილის ბოლოს 3 მეტრამდე ნალექი და სრიალისთვის იდეალური პირობები იყო, მთის ტრასების სააგენტომ სეზონი 19 აპრილს ოფიციალურად დახურა, რითაც ბიზნესს შემოსავლის მიღების ბოლო შანსიც წაართვა.