“მომხმარებლები 30%-ით შემცირდა”- რა გავლენა აქვს საავიაციო საწვავისა და ავიაბილეთების გაძვირებას ტურპაკეტების ღირებულებაზე?

საავიაციო ბაზარზე არსებული რთული ვითარება და საწვავის ფასის მატება პირდაპირ აისახა ტურისტულ სექტორზე. ტურიზმის სექტორის წარმომადგენლების განცხადებით, ავიაბილეთების გაძვირებამ გამოიწვია სრული ტურისტული პაკეტების ღირებულების ზრდა, რადგან პაკეტის ფასის 70%-ს სწორედ ფრენის ხარჯი შეადგენს.

“პეგას ტურისტიკ საქართველოს და აზერბაიჯანის” ხელმძღვანელი bm.ge-სთან აცხადებს, რომ ფასნამატი ფიქსირდება ყველა მიმართულებით, ფრენის ხანგრძლივობისა და ხარჯების მიხედვით. მაგალითად, თუ აპრილში გარკვეულ მიმართულებაზე ფასნამატი 60 დოლარი იყო, სალომე ბერაია ამბობს, რომ მაისში მან 80 დოლარს მიაღწია.

“ყველა მიმართულებაზე გვაქვს ფასნამატი და მაქსიმალურად ვცდილობთ, არ ავსახოთ მომხმარებელზე [ გაყიდულ ტურისტულ პაკეტებს ვგულისხმობ], თუმცა იმ პაკეტებში, რომლებიც შემდეგში უნდა გაიყიდოს (ეს ეხება ივნისის, ივლისის და აგვისტოს თვის პაკეტებს), ბუნებრივია ჩვენც მოგვიწია ამ ფასნამატის შეყვანა.

ზემოაღნიშნულმა ფაქტმა ბუნებრივია შეაშინა ჩვენი მომხმარებელი. ისინი ცდილობენ არ დახარჯონ თანხები, აქვთ იმედი, რომ ფასების კორექცია მოხდება, თუმცა ჩემი და ჩემი კოლეგების პროგნოზი აბსოლუტურად სხვანაირია. მე არ ვურჩევ ჩვენს მომხმარებელს მოგზაურობის დიდხანს გადადებას, იმიტომ რომ ფასის კორექცია შესაძლებელია, თუმცა არა მომხმარებლის სასარგებლოდ, არამედ პირიქით. ჩვენ ყოველთვიურად ველოდებით, რომ კიდევ გაიზრდება ფასები.

მაგალითად, აპრილის თვეში თუ გვქონდა რაღაც კონკრეტულ მიმართულებაზე 60 დოლარის სხვაობა, მაისის თვეში იმავე მიმართულებაზე მოვიდა 80 დოლარის ფასნამატი. ეს გულისხმობს თითოეულ ადამიანზე გაძვირებული ბილეთის ტარიფს. შესაბამისად, წინასწარ იმის პროგნოზი, თუ რამდენით მოიმატებს ან დაიკლებს, ან თუნდაც იგივე თანხები დაჯდება ივნისის, ივლისის და აგვისტოს თვეში, შეუძლებელია, იმიტომ რომ ეს ყველაფერი დამოკიდებულია პოლიტიკურ მდგომარეობაზე,”-აცხადებს სალომე ბერაია.