მოსალოდნელია თუ არა სამართლებრივი პროცესები მამუკა მდინარაძის წინააღმდეგ? - პრემიერის პასუხი

პრემიერი ირაკლი კობახიძე მიიჩნევს, რომ მამუკა მდინარაძესთან დაკავშირებით სამართლებრივი პროცესების შესაძლო დაწყებაზე კითხვას "არავითარი საფუძველი არ აქვს". მან ამის შესახებ "ქართული ოცნების" გორგასლის ოფისში, მედიასთან განაცხადა, სადაც დღეს პარტიის პოლიტიკური საბჭოსა და საპარლამენტო უმრავლესობის ფორმატში გაიმართა შეხვედრა.

"ჩემი მოლოდინია, რომ არ უნდა ველოდოთ",- ამბობს კობახიძე.

მისივე თქმით, მამუკა მდინარაძესთან კომუნიკაცია პერიოდულად აქვს.

"მამუკა მდინარაძე პოლიტიკიდან არის გასული. მე მგონი არასწორია ამ საკითხის ზედმეტად წინ წამოწევა, როდესაც ადამიანი პოლიტიკიდან გასულია. მე ვერ ვხედავ კითხვებისთვის საფუძველს. [შეხვედრაზე] საუბარი შეეხო იმ ფაქტს, რომ ადამიანი, რომელიც იკავებდა სხვადასხვა მაღალ თანამდებობას, გავიდა პოლიტიკიდან და ამასთან დაკავშირებით გაკეთდა ძალიან ზოგადი კომენტარი",- ამბობს კობახიძე.