მსოფლიო ბაზარზე ნავთობი მცირედით გაიაფდა

ახლო აღმოსავლეთის საზღვაო სრუტეებში ტვირთების გადაზიდვის ნაწილობრივი აღდგენის ფონზე, 31 ივლისს ნავთობის მსოფლიო ფასები 1%-ზე მეტით შემცირდა. Brent-ის მარკის ნავთობის ფიუჩერსები 1.44%-ით დაეცა და ბარელზე $87.75 შეადგინა, ხოლო ამერიკული WTI-ის ღირებულება 1.77%-ით შემცირდა და $82.11-ს გაუტოლდა. თუმცა საყურადღებო ფაქტია, რომ ივლისის ჯამური მონაცემებით, ორთვიანი კლების შემდეგ ორივე მარკაზე ფასი გაზრდილია. Brent-ის თვიურმა მატებამ უკვე 21% შეადგინა, ხოლო WTI-ის მაჩვენებელი 18%-ითაა გაზრდილი.

ექსპერტების შეფასებით, ბაზარზე ფიუჩერსებით მოვაჭრეებმა ყურადღება სამხედრო ესკალაციიდან უშუალოდ საზღვაო გადაზიდვების სტატისტიკაზე გადაიტანეს, რამაც გაცილებით უფრო რეალისტური ფასების განსაზღვრა გახადა შესაძლებელი. SEB Research-ის ანალიტიკოსის, ოლე ჰვალბიეს განცხადებით, ბაზრის მონაწილეებმა იციან, რომ ყოველი მორიგი დაძაბულობის შემდეგ ნავთობის ნაკადები რამდენიმე დღეში ნაწილობრივ მაინც აღდგება ხოლმე და ამას პრაქტიკაც ადასტურებს.

Kpler-ის საზღვაო მონაცემებით, ბაბ-ელ-მანდების სრუტე უკვე 25-მა სატვირთო გემმა გაიარა. თუმცა ჰორმუზის სრუტეში მოძრაობა კვლავ შეზღუდული რჩება და ის ბოლო 24 საათში მხოლოდ ორმა ტანკერმა გადაკვეთა.

ცნობისთვის, ამერიკა-ირანის კონფლიქტის დაწყებამდე ჰორმუზის სრუტეზე გლობალური ნავთობისა და თხევადი ბუნებრივი აირის მიწოდების მეხუთედზე მეტი მოდიოდა. საომარი მოქმედებების შედეგად, ამ საზღვაო არხში ტვირთბრუნვა მკვეთრად შემცირდა და გარკვეული პერიოდით სრულადაც შეჩერდა.