მთავრობა საუნივერსიტეტო ქალაქს თბილისი-რუსთავის მაგისტრალთან ააშენებს - მიმდინარეობს მიწების გამოსყიდვა
მუნიციპალური განვითარების ფონდი 40,000 სტუდენტზე გათვლილი რუსთავის საუნივერსიტეტო ქალაქის ასაშენებლად შერჩეულ არეალში უძრავი ქონებების კერძო მესაკუთრეებისგან გამოსყიდვის პროცედურებს აწარმოებს. ამის შესახებ ფონდმა დეპუტატ სოფიო ხორგუანს სადეპუტატო კითხვის პასუხად მისწერა.
ფონდის ინფორმაციით, ლევან სამხარაულის სახელობის სასამართლო ექსპერტიზის ბიუროს მიერ აღნიშნულ არეალში მოქცეული უძრავი ქონებები შეფასდა. ამ ეტაპზე, ფონდის მიერ კანონმდებლობის მოთხოვნათა შესაბამისად, უძრავი ქონებების კერძო მესაკუთრეებისგან გამოსყიდვის პროცედურები მიმდინარეობს.
აღსანიშნავია, რომ საქართველოს მუნიციპალური განვითარების ფონდს რუსთავში, საუნივერსიტეტო ქალაქის მშენებლობისთვის საჭირო დეტალური საპროექტო-სახარჯთაღრიცხვო (მათ შორის, ქალაქმშენებლობითი) დოკუმენტაციის მოსამზადებლად მომსახურების, შესაბამისი სამშენებლო სამუშაოებისა და მასთან დაკავშირებული საზედამხედველო მომსახურების შესყიდვა საქართველოს მთავრობის 2025 წლის 1 დეკემბრის განკარგულების საფუძველზე დაევალა.
როგორც ცნობილია, რუსთავის საუნივერსიტეტო ქალაქი რუსთავის მიმდებარე ტერიტორიაზე, ქალაქში შესვლამდე გაჩიანის ხიდის ქვედა არეალშია გათვალისწინებული. აღნიშნულ ტერიტორიაზე ასობით მიწის ნაკვეთი მდებარეობს. მათგან ნაწილი სახელმწიფოს საკუთრებაშია უკვე, ნაწილი კი კერძო საკუთრებაში.
რა რაოდენობის და რა ფართობის მიწის ნაკვეთები დარჩა სახელმწიფოს გამოსასყიდი, ამ კითხვით მუნიციპალური განვითარების ფონდს მივმართეთ, თუმცა გვითხრეს, რომ ეს ინფორმაცია საჯარო ინფორმაციის წესით უნდა გამოვითხოვოთ. რა ფართობის და რამდენი მიწის ნაკვეთი დარჩა გამოსასყიდი, როდის დასრულდება პროცესი და რა ფასაც გამოისყიდის სახელმწიფო მიწებს - ამ და სხვა კითხვებით BM.GE0-მ მუნიციპალური განვითარების ფონდს უკვე მიმართა და მათ პასუხს მირებისთანავე შემოგთავაზებთ.
შეგახსენებთ, გასული წლის მიწურულს მთავრობის მიერ დაანონსებული საუნივერსიტეტო რეფორმის ფარგლებში, საუნივერსიტეტო ქალაქის მშენებლობა რუსთავის მიმდებარე ტერიტორიაზე იგეგმება. როგორც გასული წლის 1 დეკემბერს განათლების მინისტრმა განაცხადა, რუსთავში საუნივერსიტეტო ქალაქის ახალი პროექტის ფარგლებში მოეწყობა მაღალი სტანდარტის ხელმისაწვდომი საცხოვრებლები, უნივერსიტეტები, პროფესორ-მასწავლებლების განთავსებისთვის განკუთვნილი ოთახები, რეკრეაციული ზონები ანუ ყველაფერი ის, რაც სასწავლო პროცესის წარმოებისთვის არის საჭირო.