"მთავრობას ბიუჯეტზე საუბრის უფლება არ აქვს, როცა 2025 წელს ₾600 მლნ აუთვისებელი დარჩა" - ვიკა ფილფანი დიუშენის წამლების დაფინანსებაზე

პარლამენტარი და პარტია "გახარია-საქართველოსთვის" წარმომადგენელი ვიკა ფილფანი აკრიტიკებს ჯანდაცვის სამინისტროს არგუმენტებს, რომლის მიხედვითაც დიუშენის კუნთოვანი დისტროფიის სამკურნალო მედიკამენტების დაფინანსება გამართლებული არ არის.

საქმე ისაა, რომ ბოლო თვეებია, დიუშენის კუნთოვანი დისტროფიით დაავადებული ბავშვებისთვის ძვირად ღირებული მედიკამენტების დაფინანსების საკითხი კვლავ მწვავე განხილვის საგანია. ჯანდაცვის სამინისტრო პაციენტების მოთხოვნას კი წამლის სანდოობისა და საერთაშორისო ავტორიზაციის რისკებით პასუხობს.

კერძოდ, ჯანდაცვის მინისტრმა, მიხეილ სარჯველაძემ თქვა, რომ ერთ-ერთი მოთხოვნილი მედიკამენტი ევროპის წამლის სააგენტომ (EMA) დაიწუნა, რადგან "12 თვის შემდეგ მოძრაობის უნარის გაუმჯობესების ეფექტი პლაცებოსთან შედარებით არ დადასტურდა". გარდა ამისა, მინისტრის თქმით, ამერიკის საკვებისა და წამლის ადმინისტრაციამ (FDA) აღნიშნულ მედიკამენტზე, რომელსაც მანამდე დაჩქარებული ავტორიზაცია ჰქონდა, კლინიკური კვლევები ფატალური შემთხვევების (ღვიძლის მძიმე დაზიანების გამო) დაფიქსირების შემდეგ შეაჩერა.

"ანალიტიკას" ეთერში საუბრისას, პასუხად მინისტრის არგუმენტზე, თითქოს სახელმწიფო პროგრამაში წამლის ჩართვით მთავრობა არააკრედიტებულ მედიკამენტზე პასუხისმგებლობას იღებს, ფილფანი აღნიშნავს, რომ იშვიათი დაავადებების შემთხვევაში მიდგომა განსხვავებულია და პაციენტებს ბრძოლის შანსი უნდა მიეცეთ.

"ამ ბავშვების შემთხვევაში ორი არჩევანი დგას: ერთი, რომ დაელოდონ უმოქმედოდ, რისი გარდაუვალი შედეგიც ყველასთვის ცნობილია. მეორეა - გარისკონ და იმკურნალონ იმ წამლებით, რითაც მკურნალობს მსოფლიო, ამერიკა, ევროპა. კიბოს წამალიც არ არის სრულყოფილად გამოგონილი, მაგრამ ადამიანები იტარებენ ქიმიოთერაპიას, რომელსაც ახლავს გვერდითი მოვლენები. ადამიანებს აქვთ არჩევანი, რომ გარდაუვალი შედეგის ლოდინს ყოველთვის ურჩევნიათ ის შესაძლებლობა გამოიყენონ, რაც დღეს მსოფლიოში არსებობს", - განაცხადა ფილფანმა.

მინისტრ სარჯველაძის განცხადებით, დიუშენის კუნთოვანი დისტროფიით დაავადებული 100-მდე პაციენტისთვის მედიკამენტების შეძენა წლიურად საშუალოდ, 100 მილიონ ლარამდე დაჯდება. დეპუტატის განმარტებით, ეს თანხა მიხეილ სარჯველაძემ არა მწარმოებელთან, არამედ "გადამყიდველ კომპანიასთან" კონსულტაციის შემდეგ დაასახელა. ფილფანის განცხადებით, ხელისუფლებას საბიუჯეტო დეფიციტზე საუბრის უფლება არ აქვს და მიზეზად სახელმწიფო თანხების გაფლანგვის ფაქტები მოჰყავს.

"ეს თანხაც, 100 მილიონი ლარი, არის ბატონი სარჯველაძის დასახელებული მას შემდეგ, რაც მათ გაიარეს კონსულტაციები გადამყიდველ კომპანიასთან. ეს არ არის პირდაპირი მოწოდებული თანხა წამლის მწარმოებლისგან, პროვაიდერი კომპანიისგან.

გასაგები რომ იყოს, რატომ არ აქვთ მათ ბიუჯეტზე საუბრის უფლება: 2025 წელს ბიუჯეტიდან 600 მილიონი ლარი დარჩა სრულიად აუთვისებელი სახელმწიფოს მიერ. 2026 წელს 60 მილიონზე მეტი გამოიყო 900 ახალი ავტომობილის საყიდლად. სულ რაღაც ორი კვირის წინ 141 ათას ევროზე მეტი აჩუქეს ელექტრომობილების კომპანიას მხოლოდ კვლევის ჩასატარებლად.

ამ ადამიანებს არანაირი უფლება არ აქვთ ისაუბრონ ბიუჯეტის კეთილგონიერად მოხმარებაზე. აქედან გამომდინარე, ნამდვილად არაფერი არ არის 100 მილიონი მაშინ, როდესაც ბიძინა ივანიშვილს 500 მილიონი აპატიეს, რომელიც ბიუჯეტში უნდა შეეტანა გადასახადების სახით", - განაცხადა ვიკა ფილფანმა.

ცნობისთვის: საქართველოში დიუშენის სინდრომით დაავადებული ბავშვების მშობლები უკვე რამდენიმე კვირაა ჯანდაცვის სამინისტროსთან აქციებს მართავენ და სახელმწიფოსგან უახლესი გენური თერაპიის მედიკამენტების შემოტანასა და დაფინანსებას მოითხოვენ.