მყარი წიაღის გადამუშავების ახალ რეგულაციებში ბიზნესის შენიშვნების 98% გათვალისწინებულია – რა იცვლება სექტორში?
მყარი სასარგებლო წიაღისეულის მოპოვებისა და დამუშავების სექტორში მტვრის გაფრქვევის კონტროლის ახალი სტანდარტები წესდება. გარემოს დაცვისა და სოფლის მეურნეობის სამინისტრომ, ბიზნეს ასოციაციასთან და დარგის წარმომადგენლებთან ერთად, რეგულაციების სამუშაო ვერსია განიხილა.
როგორც საქართველოს ბიზნეს ასოციაციის აღმასრულებელმა დირექტორმა ლევან ვეფხვაძემ BMG-ს განუცხადა, სამინისტროსთან ბოლო კვირების განმავლობაში ინტენსიური კომუნიკაცია მიმდინარეობდა, რათა დოკუმენტი ბიზნესისთვის რეალისტური ყოფილიყო.
მისი თქმით, საწყის სამუშაო ვერსიაში ბიზნესსექტორს არაერთი შენიშვნა ჰქონდა, თუმცა დიალოგის შედეგად თითქმის ყველა მათგანი დაკმაყოფილდა.
როგორც ვეფხვაძე განმარტავს, ახალი რეგულაციის ერთ-ერთი მთავარი სიახლე მტვრის გაფრქვევის ნორმების დიფერენცირებაა დასახლებული პუნქტებიდან დაშორების მიხედვით. წესდება ე.წ. 500-მეტრიანი ზღვარი, რაც ბიზნესის ერთ-ერთი მთავარი მოთხოვნა იყო.
„მთავარი მიზანია, რომ მტვერი არ წარმოიქმნას და შემოდის გარკვეული სტანდარტები. ის საწარმო, რომელიც დასახლებულ პუნქტთან 500 მეტრზე ახლოსაა, იქ მტვრის მაქსიმალური დასაშვები ნორმა იქნება 1.5-დან 1.7 მილიგრამამდე კუბურ მეტრში. ხოლო მათთვის, ვინც 500 მეტრზე უფრო შორსაა, ნორმა იქნება 2.5 მილიგრამი და ნაკლები“, - განმარტავს ბიზნეს ასოციაციის ხელმძღვანელი.
მისივე თქმით, რეგულაცია ასევე აზუსტებს ტექნიკურ საკითხებს, მაგალითად: სად უნდა აიღონ მტვრის სინჯები და რა შემთხვევებშია სავალდებულო მასალების მორწყვა. ამასთან, თუკი მასალა თავისი ბუნებით მტვერს არ წარმოქმნის, იქ ბარიერები არ დაწესდება.
ბიზნეს ასოციაციის აღმასრულებელი დირექტორი მიიჩნევს, რომ ახალი წესები პასუხობს საჯარო ინტერესს, დაიცვას მოსახლეობა მტვრისგან, თუმცა, ისე, რომ საწარმოო პროცესები არ შეჩერდეს.