"ოჯახური" ფარშის საკმაზის კონკრეტულ პარტიას ქსელებიდან იღებს - განცხადება

საკმაზების მწარმოებელი კომპანია "ოჯახური" სურსათის ეროვნული სააგენტოს ბრძანების საფუძველზე გაყიდვებიდან იღებს ფარშის საკმაზის კონკრეტულ პარტიას და ამავდროულად აჩერებს მომწოდებლისგან ნედლეულის მიღებას.

კომპანიის დირექტორის, ეკატერინე გუდავაძის განცხადებით, საუბარია „დაბის“ ფარშის საკმაზის პარტიაზე, ნომრით: 29.06.2026-29.06.2028, რომელიც უახლოეს პერიოდში სრულად იქნება ამოღებული ქსელური მარკეტებიდან.

კომპანიის ხელმძღვანელი საზოგადოებას მიმართავს და განმარტავს, რომ პროდუქციის ნიმუშები საერთაშორისო აკრედიტაციის მქონე ლაბორატორია Bior Laboratory-ში გაიგზავნა.

აკრძალული საღებავები სანელებლებში - რა გამოავლინა სურსათის სააგენტომ?

„ჩვენთვის ,,დაბიში“ არაფერია იმაზე უფრო მნიშვნელოვანი და პრიორიტეტული, ვიდრე მომხმარებლის ჯანმრთელობა და მათთვის უსაფრთხო, ხარისხიანი პროდუქციის მიწოდება. სწორედ ამიტომ, განცხადების გარეშე ვერ დავტოვებდით სურსათის ეროვნული სააგენტოდან მიღებულ ბრძანებას, რომლის მიხედვითაც გაყიდვებიდან ვიღებთ ფარშის საკმაზის საეჭვო პარტიას და ამავდროულად ვაჩერებთ პარტნიორისგან ნედლეულის მიღებას.

ჩვენ აქტიურ კომუნიკაციას ვაწარმოებთ შესაბამის ორგანოებთან, რათა ყველაფერი უფრო ცხადი და ნათელი გახდეს. მაქსიმალური უსაფრთხოებისთვის ფარშის საკმაზი, კონკრეტული პარტია (პარტიის ნომერი: 29.06.2026-29.06.2028) უახლოეს პერიოდში სრულად იქნება ამოღებული ქსელური მარკეტებიდან.

საკითხის დამატებითი, დამოუკიდებელი ლაბორატორიული კვლევით გადამოწმების მიზნით, პროდუქციის შესაბამისი ნიმუშები საერთაშორისო აკრედიტაციის მქონე ლაბორატორიას - Bior Laboratory-ს ეგზავნება.

გვინდა აღვნიშნოთ, რომ საკითხი ეხება მხოლოდ ფარშის საკმაზის კონკრეტულ პარტიას და არ უკავშირდება კომპანიის მიერ წარმოებულ სხვა პროდუქციას. [...] ბოდიშს გიხდით შექმნილი გაუგებრობისთვის და გპირდებით, ყველაფერს საფუძვლიანად გამოვიძიებთ. რეკომენდაციის სახით მოგიწოდებთ, რომ აღნიშნული თარიღით წარმოებული პროდუქცია არ გამოიყენოთ ლაბორატორიული კვლევის შედეგების მიღებამდე“.

„დაბიში“, რომელიც "ოჯახურის" ბრენდით იყიდება აცხადებენ, რომ კომპანიისთვის პრიორიტეტულია HACCP-ის უვნებლობის სტანდარტების დაცვა და ინციდენტს ბოლომდე გამოიკვლევენ.