OpenAI-ის თანადამფუძნებელი Anthropic-ში გადავიდა

ანდრეი კარპატიმ განაცხადა, რომ საქმიანობას კომპანია Anthropic-ში გააგრძელებს. იგი არის ხელოვნური ინტელექტის სფეროში მომუშავე ცნობილი მკვლევარი, OpenAI-ის თანადამფუძნებელი და Tesla-ს ხელოვნური ინტელექტის მიმართულების ყოფილი ხელმძღვანელი.

კარპატი მუშაობას მიმდინარე კვირას დაიწყებს და უხელმძღვანელებს ახალ გუნდს, რომლის მიზანიც Claude-ის გამოყენებით წინასწარი წვრთნის კვლევების დაჩქარებაა, რაც AI-ს საბაზისო ცოდნისა და შესაძლებლობების შეძენაში ეხმარება.

კარპატის განმარტებით, დიდი ენობრივი მოდელების განვითარების კუთხით მომავალი რამდენიმე წელი გარდამტეხი იქნება, ამიტომ იგი კვლევებისა და განვითარების პროცესს დიდი ენთუზიაზმით უბრუნდება.

მნიშვნელოვანია ითქვას, რომ ანდრეი კარპატიმ OpenAI ჯერ კიდევ 2017 წელს დატოვა, რის შემდეგაც ილონ მასკმა იგი Tesla-ში ავტოპილოტის კომპიუტერული ხედვის გუნდის ხელმძღვანელად გადაიყვანა. მასკმა კარპატი OpenAI-იდან იმ პერიოდში გადაიბირა, როდესაც თავად ორივე ტექნოლოგიური კომპანიის დირექტორთა საბჭოს წევრი იყო.

როგორც ირკვევა, ეს Anthropic-ის მიერ ბოლო პერიოდში განხორციელებული კიდევ ერთი მაღალი პროფილის ტრანსფერია, რაც OpenAI-ისთან გამძაფრებულ კონკურენციასა და ნიჭიერი კადრების მოზიდვისთვის ბრძოლას უკავშირდება. მიმდინარე თვეს კომპანიას xAI-ის დამფუძნებელი წევრი და Tesla-ს ყოფილი თანამშრომელი როს ნორდინიც შეუერთდა.