"ოცნებამ" დაასკვნა, რომ პრობლემა არა ფასები, არამედ მოსახლეობის უმრავლესობის სიღარიბეა" - ყოფილი ელჩი

საქართველოს ყოფილი ელჩი გერმანიაში, ელგუჯა ხოკრიშვილი სოციალურ ქსელში საქართველოში ფასების ზრდასა და ეკონომიკურ მდგომარეობაზე წერს. პოსტში ის აღნიშნავს, რომ არსებული შეფასებები პრობლემის რეალურ მიზეზებს ვერ ხსნის.

„ფასების კომისიამ დაასკვნა, რომ ყველაფერი წესრიგშია, ბაზარი ნორმალურად მუშაობს. “ოცნებამ“ დაასკვნა, რომ პრობლემა ფასები კი არა მოსახლეობის უმრავლესობის სიღარიბეა და ამიტომ ვერ ყიდულობენ გაძვირებულ პროდუქტებს.

კომისიამ სიმპტომი შეისწავლა, მიზეზით არც დაინტერესებულა. პასუხი სულ სხვა კითხვაზე გასცა. მარჟები გადაჭარბებული არ არის, ბაზარი, ისევე როგორც აღმოსავლეთ ევროპაში, ე.წ. Hi-Lo (დახლზე მაღალი ფასი, მაგრამ მუდმივი აქციებითა და ფასდაკლებებით) მოდელით მუშაობს“, - წერს ის.

ყოფილი ელჩი ასევე სვამს კითხვას, რატომ ძვირდება პროდუქტები მუდმივად, რაზედაც თავადვე პასუხობს, რომ მთავარი მიზეზი იმპორტზე მაღალი დამოკიდებულებაა: „საქართველო პროდუქტების უმეტეს ნაწილს იმპორტით შემოაქვს. ადგილობრივად თითქმის არაფერი იწარმოება. გლობალური ფასების ყოველი ზრდა პირდაპირ ქართულ დახლზე აისახება“.

ხოკრიშვილი მიიჩნევს, რომ ადგილობრივი წარმოების გაძლიერებისა და ეკონომიკური განვითარებისკენ მიმართული ძირითადი მექანიზმები პრაქტიკულად შეჩერებულია. მისი თქმით, იაფი საკრედიტო რესურსები, სოფლის მეურნეობის განვითარების პროგრამები და ლოგისტიკური ინფრასტრუქტურის გაუმჯობესება, რომლებიც წარმოების სტიმულირებას უნდა ემსახურებოდეს, ან აღარ ფუნქციონირებს ან მნიშვნელოვნადაა შეფერხებული. ამასთან, მისი შეფასებით, ეკონომიკური ზრდის ოფიციალური მაჩვენებლები მოსახლეობის ყოველდღიურ ცხოვრებაზე სრულად არ აისახება.

"საქართველო პროდუქტების უმეტეს ნაწილს იმპორტით შემოაქვს. ადგილობრივად თითქმის არაფერი იწარმოება. გლობალური ფასების ყოველი ზრდა პირდაპირ ქართულ დახლზე აისახება. ევროინტეგრაციასთან ერთად გაიყინა ზუსტად ის შესაძლებლობები, რაც ამას შეცვლიდა. იაფი კრედიტები მწარმოებლებისთვის, სოფლის მეურნეობის განვითარების პროგრამები, ლოგისტიკის გაუმჯობესება. ყველაფერი გაჩერდა.