„ოცნების“ დეპუტატმა ლევან მახაშვილმა 2025 წელს ბაკურიანში ბინა შეიძინა - ქონებრივი დეკლარაცია

„ქართული ოცნების“ დეპუტატმა ლევან მახაშვილმა გასულ წელს ბაკურიანში ბინა იყიდა. მმართველი პარტიის წევრმა დეკლარაცია შეავსო, რომელშიც მისი 2025 წლის ქონებრივი მდგომარეობაა ასახული.

XI მოწვევის პარლამენტის წევრს საკუთრებაში აქვს თბილისში ბინები - ყაზბეგის გამზირზე 51 კვ.მ., მინდელიქ ქუჩაზე 52.5 კვ.მ., გივი კარტოზიას ქუჩაზე 105.2 კვ.მ., რომლის 50%-იანი წილის მესაკუთრე მისი ცოლი განა შევჩენკოა. მახაშვილის ცოლის საკუთრებაშია ასევე უკრაინაში, კიევში 53.7 კვ.მ-ის ფართობის ბინა. ლევან მახაშვილმა დაბა ბაკურიანში 39.5 კვ.მ. ბინა 31 000 დოლარად იყიდა, რაც გასავალში დააფიქსირა.

განა შევჩენკო ნაღდი დანაზოგის სახით ინახავს ასევე 20 000 დოლარს. მას, როგორც ინდმეწარმეს გასულ წელს 95 420 ლარის შემოსავალი ჰქონდა.

ქონებრივი დეკლარაციიდან ჩანს, რომ დეპუტატი ლევან მახაშვილს 2025 წელს პარლამენტში მუშაობისთვის 119 731 ლარის ხელფასი აქვს აღებული. ის თსუ-ში მიწვეული ლექტორიც იყო, რისთვისაც 1809 ლარი გადაუხადეს. „აღმოსავლეთ ევროპის უნივერსიტეტში“ და „ევროპის უნივერსიტეტში“ კი ის ასოცირებული პროფესორი იყო, რისთვისაც ანაზღაურების სახით 4 422 ლარი და 1 937 ლარი აიღო.