პაკისტანში კრიპტო შეიზღუდება?
პაკისტანის ვირტუალური აქტივების მარეგულირებელმა ორგანომ (PVARA) ქვეყნის წამყვან ისლამურ სემინარიას ციფრული ტოკენების კლასიფიკაციის თაობაზე მიმართა. როგორც ირკვევა, უწყების ეს ნაბიჯი გავლენიანი რელიგიური სასწავლებლის მიერ კრიპტოთი ვაჭრობის ჰარამად გამოცხადებას უკავშირდება.
რელიგიური განჩინების მიხედვით, კრიპტოაქტივები ისლამური სამართლით სიმდიდრედ არ მიიჩნევა, რამაც ქვეყანაში ციფრული ბაზრის რეგულირების პროცესი მნიშვნელოვნად შეაფერხა. პაკისტანის ხელისუფლება, რომელიც კრიპტობირჟების ლიცენზირების რეფორმას აქტიურად ახორციელებს, შექმნილ ვითარებაში გამოსავლის პოვნას ცდილობს.
ანალიტიკოსები ვარაუდობენ, რომ ისლამური სემინარიის მიერ მიღებულ გადაწყვეტილებას მუსლიმურ სახელმწიფოებში კრიპტოინვესტორების აქტივობაზე ნეგატიური გავლენა ექნება. მიუხედავად იმისა, რომ ქვეყანაში სავაჭრო მოცულობები ჯერ კიდევ სტაბილურია, ზოგიერთმა მსხვილმა მოთამაშემ კაპიტალის რეალოკაცია უკვე დაიწყო და თუ მარეგულირებელსა და სემინარიას შორის კომპრომისული შეთანხმება არ შედგება, შესაძლოა, მორწმუნე ინვესტორებმა კრიპტოაქტივები გაყიდონ, რადგან მისი ფლობა ჰარამია.
BM.GE
წყარო: bm.ge