Palantir-ის შემოსავალი რეკორდულად გაიზარდა და მოლოდინს გადააჭარბა

ამერიკულმა ტექნოლოგიურმა კომპანია Palantir-მა 2026 წლის პირველი კვარტალის ფინანსური შედეგები გამოაქვეყნა და უოლ-სტრიტის ანალიტიკოსების პროგნოზებს მნიშვნელოვნად გადააჭარბა.

როგორც ირკვევა, ბოლო სამ თვეში კომპანიის შემოსავალი 85%-ით გაიზარდა და $1.63 მილიარდი შეადგინა, რაც 2020 წლის შემდეგ ყველაზე მაღალი მაჩვენებელია. წმინდა მოგება გასული წლის ანალოგიურ პერიოდთან შედარებით თითქმის გაოთხმაგდა და $870.5 მილიონს მიაღწია.

აღსანიშნავია, რომ თუ გასულ წელს თითო აქციაზე მოგება $0.8 ცენტს შეადგენდა, ამჯერად მაჩვენებელი $0.33 ცენტამდე გაიზარდა. არსებული მონაცემებით, კომპანიის თავისუფალი ფულადი ნაკადების პროგნოზი მიმდინარე წლისთვის $4.4 მილიარდამდე გაიზარდა.

როგორც ირკვევა, კომპანიის ზრდაში მთავარი როლი ამერიკულმა სამთავრობო და კომერციულმა სექტორებმა ითამაშეს. აშშ-ის საჯარო უწყებებიდან მიღებული შემოსავალი 84%-ით გაიზარდა და $687 მილიონი შეადგინა. ამასთან, ამერიკულ კომერციულ ბაზარზე შემოსავლების 133%-იანი მატება დაფიქსირდა.

ფინანსური წარმატების მიუხედავად, მიმდინარე წელს კომპანიის აქციების ფასი ბირჟაზე 18%-ით შემცირდა. ანალიტიკოსები ამ ვარდნას ხელოვნური ინტელექტის სფეროში მომუშავე ახალი კონკურენტების გააქტიურებას უკავშირებენ. პარალელურად, ინვესტორების არაერთგვაროვანი რეაქცია მოჰყვა კომპანიის მიერ სამომავლო ვალდებულებების მოცულობის $4.45 მილიარდამდე ზრდას, რაც გასული წლის მონაცემს ორჯერ აღემატება. თუმცა, როგორც აღმასრულებელი დირექტორი, ალექს კარპი განმარტავს, Palantir-ი სხვა დეველოპერებისგან განსხვავებულ გზას გადის და, შესაბამისად, ის პარტნიორებისთვის რეალური სარგებლის გაზიარებას მარტივად შეძლებს.

ცნობისთვის, Palantir-ის ტექნოლოგიები აშშ-სა და მის მოკავშირეებს სამხედრო კონფლიქტებში უპირატესობას ანიჭებს. ის მილიონობით მონაცემის დროულ ანალიზს ატარებს და კონტრაქტორებს უკონკურენტო მომსახურებას რეალურ დროში უწევს.