პარლამენტმა სამართალდამცავთა კოორდინაციის საკითხებში სახელმწიფო მინისტრის პოსტი დაამტკიცა

პარლამენტმა საბოლოო მოსმენით დაუჭირა მხარი საკანონმდებლო ცვლილებას, რომელიც მთავრობის სტრუქტურაში ახალი თანამდებობის სამართალდამცავი ორგანოების კოორდინაციის საკითხებში სახელმწიფო მინისტრის პოსტის შემოღებას გულისხმობს.

აღნიშნულ თანამდებობას სახელმწიფო უსაფრთხოების სამსახურის ყოფილი უფროსი, მამუკა მდინარაძე დაიკავებს.

ახალი მინისტრის სტატუსი მთავრობის საპარლამენტო მდივანმა იურიდიულ საკითხთა კომიტეტზე წარდგენისას დაახასიათა, როგორც ე.წ. „უპორტფელო მინისტრი“. ეს ნიშნავს, რომ: სახელმწიფო მინისტრს არ ეყოლება საკუთარი აპარატი; მისი საქმიანობის მატერიალურ-ტექნიკურ უზრუნველყოფას მთავრობის ადმინისტრაცია განახორციელებს, მამუკა მდინარაძის კაბინეტი უშუალოდ მთავრობის ადმინისტრაციის შენობაში განთავსდება.

კანონმდებლობის მიხედვით, სახელმწიფო მინისტრის უფლებამოსილების კონკრეტულ ფარგლებს თავად მთავრობა განსაზღვრავს.

ოფიციალური განმარტებით, ცვლილების მიზანი სამართალდამცავ უწყებებს შორის თანამშრომლობის გაძლიერება და ეფექტიანობის გაზრდაა. მინისტრის უფლებამოსილებებში შედის: ერთობლივი ოპერაციების დაგეგმვის ხელშეწყობა; ინფორმაციის გაცვლის სტანდარტების დანერგვა; უწყებების საქმიანობის შეფასება და პრობლემური მიმართულებების იდენტიფიცირება.

ამასთან, სახელმწიფო მინისტრი კონსტიტუციური უფლებამოსილების ფარგლებში კოორდინაციას გაუწევს ურთიერთობას საქართველოს პროკურატურასთან, სახელმწიფო აუდიტის სამსახურსა და სასამართლო ხელისუფლებასთან.