პროკურატურამ ბრალი ოფიციალურად წარადგინა - გიორგი უძილაურს 12 წლამდე პატიმრობა ემუქრება
პროკურატურამ ჯაშუშობის ბრალდებით დაკავებულ ფინანსთა სამინისტროს საგამოძიებო სამსახურის ერთ-ერთი სამმართველოს უფროსს და „ქართუ ჯგუფის“ საზოგადოებასთან ურთიერთობის ყოფილ ხელმძღვანელს, გიორგი უძილაურს ბრალდება ოფიციალურად წარუდგინა.
უწყების ინფორმაციით, გამოძიება სახელმწიფო უსაფრთხოების სამსახურის კონტრდაზვერვის დეპარტამენტმა აწარმოა. პროკურატურა ამტკიცებს, რომ მაღალ თანამდებობაზე მყოფი საჯარო მოხელე უცხო ქვეყნის სპეცსამსახურებთან თანამშრომლობდა.
საგამოძიებო უწყების ვერსიით, გიორგი უძილაური მოქმედებდა უცხო ქვეყნის დაზვერვის სამსახურის დავალებით. სისტემატურად აგროვებდა და გადასცემდა მათ სხვადასხვა სახის და კატეგორიის ინფორმაციას; აღნიშნულს აკეთებდა მატერიალური სარგებლის მიღების მიზნით და საქართველოს ინტერესების საზიანოდ.
დაკავებულს ბრალდება წარედგინა საქართველოს სისხლის სამართლის კოდექსის 314-ე მუხლის პირველი ნაწილით, რაც ჯაშუშობას გულისხმობს.
„დანაშაული სასჯელის სახედ და ზომად 12 წლამდე თავისუფლების აღკვეთას ითვალისწინებს“, - აცხადებენ პროკურატურაში.
ბრალდების მხარე სასამართლოს კანონით დადგენილ ვადაში მიმართავს და გიორგი უძილაურისთვის აღკვეთის ღონისძიების სახით პატიმრობის შეფარდებას მოითხოვს.
გიორგი უძილაური წლების განმავლობაში მუშაობდა როგორც საჯარო სექტორში, ისე ბიძინა ივანიშვილთან დაკავშირებულ სტრუქტურებში. ჯერჯერობით უცნობია თავად ბრალდებულის ან მისი ადვოკატის პოზიცია წარდგენილ ბრალდებასთან დაკავშირებით.
BM.GE
წყარო: bm.ge