Qualcomm-მა პროდუქციაზე ფასები გაზარდა და კვარტალური პროგნოზი შეამცირა

ტექნოლოგიურმა გიგანტმა Qualcomm-მა მესამე ფისკალურ კვარტალში $9.95 მილიარდის შემოსავალი მიიღო, რამაც Wall Street-ის მიერ პროგნოზირებულ $9.67 მილიარდს გადააჭარბა. ამის მიუხედავად, კომპანიამ წმინდა მოგების გაზრდა ვერ მოახერხა. თუ გასული წლის ანალოგიურ პერიოდში ეს მაჩვენებელი $2.66 მილიარდს შეადგენდა, ამჯერად ის 25%-ით შემცირდა და $2 მილიარდზე ჩამოვიდა. შედეგად, Qualcomm-მა უოლ სტრიტის მოლოდინების გამართლება ვერ მოახერხა და დივიდენდის სახით თითო აქციაზე მხოლოდ $2.21 გასცა. ეს მაშინ, როცა ანალიტიკოსები მცირედით მეტს, $2.23-ს ვარაუდობდნენ.

რაც შეეხება კონკრეტულ დეტალებს, კომპანიის შემოსავლების უდიდესი ნაწილი კვლავ მობილური მოწყობილობების სეგმენტზე მოდის. სმარტფონების ჩიპების გაყიდვებმა $5.1 მილიარდი შეადგინა, თუმცა ის გასული წლის მაჩვენებელს 20%-ით ჩამორჩება. სამაგიეროდ, ავტომობილების სექტორმა დააფიქსირა $1.59 მილიარდის შემოსავალი და ზრდა, რაც ჩიპების მწარმოებელსა და გერმანულ ავტოგიგანტ BMW-ს შორის დადებული ახალი შეთანხმების დამსახურებით გახდა შესაძლებელი. ამას გარდა, ჭკვიანი მოწყობილობების მიმართულებით გაყიდვები 9%-ით გაიზარდა და $1.83 მილიარდს მიაღწია, ხოლო საპატენტო ლიცენზირების მიმართულებით კომპანიამ $1.28 მილიარდის შემოსავალი მიიღო.

ცნობისთვის, ამერიკული ტექნოლოგიური გიგანტი Qualcomm-ი მობილური პროცესორებისა და 5G ტექნოლოგიების გლობალური ლიდერია. კომპანია ამჟამად ბაზარზე პოზიციების გაფართოებას და სმარტფონების მიღმა, ავტომობილების, ჭკვიანი სათვალეებისა და ხელოვნური ინტელექტის სექტორში შემოსავლების დივერსიფიკაციას ცდილობს.