რა ეღირება საქართველოს C5 კატეგორიის ვიზა|დადგენილება დამტკიცებულია

ახალი, C5 კატეგორიის ორდინალური ვიზა, რომლის შემოღებაც პარლამენტმა მიმდინარე წლის აპრილში დაამტკიცა, მთავრობის დადგენილებაში აისახა.

აღნიშნული ვიზა სპეციალურად დისტანციურად მომუშავე, მაღალშემოსავლიანი პირებისთვისაა შექმნილი.

კერძოდ, „საქართველოს ვიზის გაცემის, მისი მოქმედების ვადის გაგრძელებისა და მოქმედების შეწყვეტის წესის დამტკიცების თაობაზე“ მთავრობის დადგენილებას C5 კატეგორიის ვიზაზე ჩანაწერი დაემატა.

C5 კატეგორიის ვიზა არის მრავალჯერადი, მოკლევადიანი ვიზა, რომელიც 5 წლის ვადით გაიცემა, ხოლო საქართველოში ყოფნის უფლებას 1 წლის ვადით იძლევა. ვიზა e-VISA PORTAL-ის მეშვეობით წარდგენილი სავიზო განაცხადის საფუძველზე გაიცემა.

დადგენილების თანახმად, C5 კატეგორიის მოკლევადიანი ელექტრონული ვიზა გაიცემა სავიზო განაცხადის წარდგენიდან მე-5 სამუშაო დღეს. დამატებითი გარემოებების გამოკვლევის საჭიროების შემთხვევაში C5 კატეგორიის მოკლევადიანი ელექტრონული ვიზის გაცემის შესახებ გადაწყვეტილება მიიღება 10 სამუშაო დღის ვადაში.

რაც შეეხება ღირებულებას, სამინისტროს საკონსულო და დიასპორის საკითხების დეპარტამენტის მიერ e-VISA PORTAL-ის მეშვეობით წარდგენილი სავიზო განაცხადის საფუძველზე C5 კატეგორიის მოკლევადიანი ელექტრონული ვიზის გაცემის საკითხის განხილვა 300 აშშ დოლარია.