რა ტენდენციები იკვეთება GFEDI 2026-ის ანგარიშიდან? - პაპუნა გიკორაშვილი საგარეო ინდექსის ფორმირებაზე
საერთაშორისო სავაჭრო პალატამ (ICC Georgia) და EBIT GROUP-მა საქართველოს საგარეო ეკონომიკური დამოკიდებულების ინდექსის (GFEDI) 2026 წლის პირველი კვარტალის ანგარიში გამოაქვეყნეს.
კვლევამ, რომელიც ქვეყნის საგარეო ეკონომიკურ მდგრადობას ხუთი ძირითადი პარამეტრით აფასებს, აჩვენა, რომ საქართველოს საგარეო სექტორის აქტივობაში კლება ფიქსირდება როგორც კვარტალურ, ისე წლიურ ჭრილში. აღნიშნული ტენდენცია თითქმის ყველა ძირითადი კომპონენტის შემცირებამ გამოიწვია, გარდა იმპორტისა.
აღნიშნულ მონაცემებს გადაცემა "ანალიტიკას" ეთერში "ებიტ ჯგუფის" საკონსულტაციო პროექტების მიმართულების ხელმძღვანელი, პაპუნა გიკორაშვილი აფასებს.
პაპუნა გიკორაშვილმა საუბრის დასაწყისში იმ პარამეტრებზე გაამახვილა ყურადღება, რომლებსაც აღნიშნული კვლევა ეყრდნობა: "საგარეო ეკონომიკური დამოკიდებულების ინდექსზე რომ ვისაუბროთ, ცოტათი მეთოდოლოგიას უნდა შევეხოთ. ეს მოიცავს როგორც ექსპორტის, იმპორტის ნაწილს, ასევე ტურიზმის, ფულადი შემოდინებების და ინვესტიციების ნაწილსაც. ანუ ეს ასახავს თითქმის სრულიად საქართველოს ეკონომიკის დამოკიდებულებას უცხოურ, მთლიან მსოფლიო ეკონომიკაზე".
მისივე განმარტებით, წინა კვარტალთან შედარებით ინდექსის შემცირება დიდწილად სეზონური ხასიათისაა, სადაც დადებითი დინამიკა მხოლოდ იმპორტის ნაწილში ნარჩუნდება.
"2025 წლის მეოთხე კვარტალთან შედარებით საგარეო ინდექსი შემცირებულია. ეს ძირითადად სეზონურობით არის გამოწვეული და ტურისტული ნაკადების შემცირებით განპირობებული, რაც მოსალოდნელიც იყო, იმიტომ რომ პირველი კვარტალი, მოგეხსენებათ, საქართველოსთვის არ არის ტურისტული სეზონი.
ყველაზე კარგი სურათი მაინც იმპორტის ჭრილში გვაქვს, იმიტომ რომ მხოლოდ იმპორტია პირველ კვარტალთან შედარებით გაზრდილი, დანარჩენი ყველა სხვა მაჩვენებელი არის მეოთხე კვარტალთან შედარებით შემცირებულია", - აღნიშნავს პაპუნა გიკორაშვილი.