რა ვითარებაა ბუნებრივი აირის ბაზარზე? - IGU-ს ანგარიში

საერთაშორისო გაზის კავშირმა (IGU) ბუნებრივი აირის საბითუმო ფასების ყოველწლიური, ანალიტიკური ანგარიში წარადგინა. დოკუმენტში ორმოცდაათზე მეტი ქვეყნის მონაცემებია გაანალიზებული, რაც დედამიწაზე მოხმარებული საწვავის 93%-ს მოიცავს.

როგორც ირკვევა, ბუნებრივი აირის გლობალურ ბაზარზე ფასების ფორმირების მექანიზმი მკვეთრად შეიცვალა და ნავთობის ღირებულებაზე მიბმული კონტრაქტების ნაცვლად, ის კონკურენტულ საბაზრო ფასწარმოქმნაზე გადავიდა. თუ 2005 წელს თხევადი ბუნებრივი აირის საბაზრო ფასწარმოქმნის წილი მხოლოდ 14%-ს შეადგენდა, ამჟამად ამ მაჩვენებელმა 52%-ს მიაღწია.

არსებული ინფორმაციით, ბაზრის ტრანსფორმაცია დიდწილად აშშ-იდან ექსპორტის ზრდამ და საერთაშორისო ვაჭრობის განვითარებამ განაპირობა. ანგარიშის თანახმად, ბუნებრივი აირის საშუალო გლობალურმა საბითუმო ფასმა 2025 წელს ერთ მილიონ ბრიტანულ თერმულ ერთეულზე (MMBtu) $5.31 შეადგინა.

რაც შეეხება სამომავლო პერსპექტივებს, ორგანიზაციის შეფასებით, გლობალურ მოთხოვნაზე გავლენას ჰორმუზის სრუტის შეფერხება და აზიის რეგიონი, კერძოდ კი ჩინეთი და ინდოეთი იქონიებს. IGU-ს შეფასებით, 2026 წელს გაზის საშუალო ფასი დაახლოებით 40-50%-ით მაღალი იქნება, რაც აშშ-ირანის ომით და აზიაში გაზრდილი მოთხოვნით იქნება განპირობებული. ცნობისთვის, ამჟამად მეგავატი/საათი ენერგიის ღირებულება ევროპულ ბაზარზე 48 ევროს შეადგენს, რაც წლიურად 37%-ით გაზრდილი მაჩვენებელია.