რას მოიცავს Honda-სა და Nissan-ის ახალი პარტნიორობა?

იაპონურმა ავტომწარმოებლებმა, Nissan-მა და Honda-მ ავტომობილების კომპიუტერული ნაწილებისა და პროგრამული უზრუნველყოფის ერთობლივად შემუშავების მიზნით შეთანხმება გააფორმეს. კომპანიების მიერ შემუშავებული ტექნოლოგიებით აღჭურვილი ტრანსპორტი ბაზარზე 2029 წელს გამოვა.

შეთანხმების თანახმად Nissan-ი და Honda ელექტრონული მართვის ბლოკების სტანდარტიზებულ ნაწილებსა და პროგრამულ უზრუნველყოფას გააზიარებენ, რაც მათ საწარმოო ხარჯებს შეამცირებს.

აღსანიშნავია, რომ მხარეებმა ელექტრომობილებისა და საავტომობილო ტექნოლოგიების განვითარების მიმართულებით თანამშრომლობის შესახებ მოლაპარაკებები ჯერ კიდევ 2024 წელს დაიწყეს და როგორც ჩანს, ამ პროცესმა შედეგიც გამოიღო.

კომპონენტების გაზიარება და ერთობლივი კვლევები ხარჯების შემცირებასა და შემუშავების პროცესის დაჩქარებას ისახავს მიზნად, ხოლო წარმოების ეტაპზე მასშტაბის ეკონომიით კომპანიების ეფექტიანობაც გაიზრდება.

ექსპერტების შეფასებით, კონკურენტების გაერთიანება ჩინეთიდან მომავალ ზეწოლას უკავშირდება, რომელმაც იაპონურ ავტოინდუსტრიას დიდი საფრთხე შეუქმნა.