რეფორმით არცერთი უმაღლესი საგანმანათლებლო პროგრამა არ გაუქმებულა. მათი ნაწილი მილევად რეჟიმში გადავიდა - მინისტრი

განათლების, მეცნიერებისა და ახალგაზრდობის მინისტრი, გივი მიქანაძე ამბობს, რომ რეფორმის ფარგლებში არცერთი უმაღლესი საგანმანათლებლო პროგრამა არ გაუქმებულა. მან ამის შესახებ პარლამენტში, ინტერპელაციით გამოსვლისას განაცხადა.

მინისტრის თქმით, პროგრამების ნაწილი მილევად რეჟიმში გადავიდა. გივი მიქანაძემ ასევე ისაუბრა საგანმანათლებლო პროგრამების ხანგრძლივობასთან დაკავშირებით.

"ხაზგასმით მინდა აღვნიშნო, რომ არცერთი უმაღლესი საგანმანათლებლო პროგრამის გაუქმება რეფორმის ფარგლებში არ მომხდარა. პროგრამების გარკვეული ნაწილი გადავიდა მილევად რეჟიმში, რაც ნიშნავს, რომ იქ ჩარიცხული სტუდენტები განაგრძობენ სწავლას იმავე პირობებით, რითაც ჩაირიცხნენ.

გაინტერესებთ 240-იანი საბაკალავრო, 120-იანი სამაგისტრო კრედიტებთან დაკავშირებით, ამასაც მოგახსენებთ. საგანმანათლებლო პროგრამების ხანგრძლივობასთან დაკავშირებით არაერთი შეხვედრა გაიმართა უმაღლესი საგანმანათლებლო დაწესებულებების წარმომადგენლებთან, მათ შორის, მინისტრის ბრძანების შესაბამისი კონცეფცია განხილულ იქნა 2026 წლის იანვარში აკაკი წერეთლის სახელმწიფო უნივერსიტეტში გამართულ რექტორთა საბჭოზე. გარდა ამისა, უნივერსიტეტებმა წერილობითი განცხადებებით მომართეს როგორც სამინისტროს, ასევე განათლების ხარისხის განვითარების ეროვნულ ცენტრს. ცენტრის მიერ მოხდა როგორც შეხვედრებზე გამოთქმული მოსაზრებების, ასევე დოკუმენტაციაში ასახული მოსაზრებების ანალიზი და ურთიერთშეჯერება. ამის საფუძველზე დადგინდა გამონაკლისები, რომლის ფარგლებშიც შესაძლებელია არანაკლებ 240-კრედიტიანი და არანაკლებ 120-კრედიტიანი საბაკალავრო და სამაგისტრო პროგრამების სისტემაში დატოვება.

განათლების ხარისხის განვითარების ეროვნული ცენტრი აქტიურ კომუნიკაციაშია უმაღლეს საგანმანათლებლო დაწესებულებებთან. უმაღლესი საგანმანათლებლო დაწესებულებები პროგრამების მოდიფიცირების შესახებ ანგარიშს წარუდგენენ ცენტრს. საბაკალავრო პროგრამებზე ანგარიშის წარმოდგენა დასრულდა პირველ მაისს და მიმდინარეობს ცენტრის მიერ პროგრამების გადამოწმება. დღეის მდგომარეობით წარდგენილი 600 საბაკალავრო პროგრამიდან ცენტრის მიერ უკვე დადასტურებულია 300 პროგრამის სამწლიან პროგრამაზე გადასვლის შესაბამისობა. აღნიშნული პროცესი უწყვეტ რეჟიმში გრძელდება და დასრულდება მიმდინარე წლის პირველ სექტემბრამდე, ანუ სასწავლო წლის დაწყებამდე.

რაც შეეხება მაგისტრატურის საფეხურს, უნივერსიტეტებს პირველ ივლისამდე აქვთ ანგარიშების წარდგენის ვადა 1+1 მოდელზე გადასვლასთან დაკავშირებით. უნივერსიტეტები ამ მიმართულებით აქტიურად მუშაობენ და გეგმავენ ანგარიშების წარმოდგენას ივნისის თვეში", - განაცხადა მინისტრმა.