როდის დაიწყება „მწვანე ბარათის“ გათამაშების რეგისტრაცია? - აშშ-ის სასამართლოს ახალი გადაწყვეტილება

აშშ-ის სასამართლოს ახალი ბრძანებით, 2027 წლის „მწვანე ბარათის“ (DV-2027) გათამაშებასთან დაკავშირებული ვადები შეიცვალა. სახელმწიფო დეპარტამენტს გათამაშების რეგისტრაციის პერიოდის გამოცხადებისთვის ვადა 29 ოქტომბრამდე გაუხანგრძლივდა. სწორედ ეს გახდა მიზეზი იმისა, რომ 15 ოქტომბერს უწყების ოფიციალურ გვერდზე სიახლე არ გამოქვეყნებულა.

მას შემდეგ, რაც კალიფორნიის სამხრეთ ოლქის მოსამართლემ, ჯინსუკ ოჰტამ წინასწარი განკარგულება გამოსცა და სახელმწიფო დეპარტამენტს ლატარიის ჩატარება დაავალა, მხარეებმა აშშ-ის მთავრობამ და კომპანია Red Eagle Law-მ სასამართლოს ერთობლივი შუამდგომლობით მიმართეს და გადაწყვეტილების შეცვლა ითხოვეს. მოსამართლემ მოთხოვნა იმავე დღეს, 14 ოქტომბერს დააკმაყოფილა.

ახალი განრიგის მიხედვით, პროცესის ძირითადი ეტაპები ორი კვირით გადავადდა:

ეტაპი თავდაპირველი ვადა ახალი ვადა რეგისტრაციის პერიოდის გამოცხადება 15 ოქტომბერი, 2026 29 ოქტომბერი, 2026 (24:00 EST) რეგისტრაციის გახსნა 18 ოქტომბერი, 2026 1 ნოემბერი, 2026 (24:00 EST) მოგებულების გამოვლენა/შეტყობინება 19 ნოემბერი, 2026 3 დეკემბერი, 2026 (24:00 EST) ვიზის გაცემის ბოლო ვადა 30 სექტემბერი, 2027 უცვლელია (30 სექტემბერი, 2027)

სასამართლოს ახალმა ბრძანებამ მხოლოდ ეს სამი თარიღი შეცვალა, ხოლო წინასწარი განკარგულების დანარჩენი პირობები ძალაში დატოვა:

• სახელმწიფო დეპარტამენტი კვლავ ვალდებულია გამოაქვეყნოს რეგისტრაციის დაწყებისა და დასრულების თარიღები, მონაწილეობის წესები და ოფიციალური ვებგვერდი. • რეგისტრაციის პროცესი 30 დღის განმავლობაში უნდა იყოს ღია. • შერჩეული აპლიკანტების განაცხადების დამუშავება უნდა გაგრძელდეს ვიზების ამოწურვამდე ან ფისკალური წლის დასრულებამდე - 2027 წლის 30 სექტემბრამდე.

ვინაიდან 30 სექტემბრის საბოლოო ვადა კანონით არის დადგენილი, ორკვირიანი დაგვიანება უშუალოდ აპლიკანტების დროს აკლდება. გამარჯვებულებს ნაკლები დრო (დაახლოებით 10 თვეზე ნაკლები) ექნებათ სააპლიკაციო ფორმის (DS-260) შესავსებად, საბუთების შესაგროვებლად, სამედიცინო შემოწმების გასავლელად და საკონსულო ინტერვიუზე დასასწრებად.

ახალი თარიღები წარმოადგენს უკიდურეს ვადას, რაც იმას ნიშნავს, რომ სახელმწიფო დეპარტამენტს რეგისტრაციის დაწყების გამოცხადება უფრო ადრეც შეუძლია. ვადების გადაწევა მხარეთა ერთობლივი თხოვნა იყო, თუმცა ბრძანებაში აღნიშნული არ არის, თუ რამ გამოიწვია დამატებითი დროის საჭიროება.