როგორ შეიცვალა ნავთობის და გაზის ფასები?

მიმდინარე კვირას ნავთობის გლობალური ფასები უმნიშვნელოდ შემცირდა, თუმცა ერთთვიან პერიოდში Brent-თან მიმართებით მაინც 20%-იანი ზრდა ფიქსირდება, რომელიც ამჟამად 105 დოლარად ივაჭრება, რაც წლის დასაწყისიდან დღემდე 73%-ით გაზრდილი მაჩვენებელია.

რაც შეეხება ამერიკულ WTI-ს, ის 92 დოლარი ღირს, რაც 62%-იან ზრდას წარმოადგენს; ხოლო რუსული Urals-ის ფასი მიმდინარე წელს 125%-ითაა გაზრდილი და ის ამჟამად 113 დოლარს აღწევს.

როგორც წესი, რუსული ნავთობის ფასი უფრო დაბალია, ვიდრე Brent-ის, თუმცა ამჟამად რუსეთში საწარმოო კრიზისია, რის გამოც ნავთობი იქ დეფიციტურია და მისი ფიუჩერსული კონტრაქტების ღირებულება გაზრდილია.

ნავთობის პარალელურად, გაძვირებულია ბუნებრივი აირიც, რომლის ღირებულებამ ერთ კვირაში 11%-ით დაიკლო და მეგავატ/საათზე 71 ევრო შეადგინა, თუმცა წელს ის მაინც 152%-ით არის გაძვირებული.

ენერგეტიკული რესურსების გაძვირება ახლო აღმოსავლეთში გეოპოლიტიკური რისკების დაბრუნებას და ჰორმუზის სრუტის შეფერხებას უკავშირდება, რაც ბაზარზე მიწოდების შეფერხებას იწვევს. ვითარებას განსაკუთრებით ის მოცემულობა ამძიმებს, რომ აშშ-ირანის მთავრობების პოზიცია აჩენს ეჭვს იმასთან დაკავშირებით, რომ შეიძლება ეს კონფლიქტი რეგიონში მოუგვარებელ პრობლემად დარჩეს.