როგორი ფინანსური შედეგები აქვს Microsoft-ს?

ინვესტორებისთვის წარდგენილი ფინანსური ანგარიშის თანახმად, წინა კვარტალში Microsoft-ის შემოსავალმა $82.9 მილიარდი შეადგინა, რაც უოლ-სტრიტის მიერ პროგნოზირებულ $81.4 მილიარდს აღემატება. თითო აქციაზე მოგება $4.27-მდე გაიზარდა, მაშინ როცა ბაზარი $4.06-ს ელოდა. თუ გასული წლის ანალოგიურ პერიოდში კომპანიამ $25.8 მილიარდიანი წმინდა მოგება მიიღო, ამჯერად ამ მაჩვენებელმა $31.8 მილიარდს მიაღწია.

კომპანიის ზრდის მთავარი მამოძრავებელი Cloud-სერვისები და ხელოვნური ინტელექტის მიმართულება აღმოჩნდა. Azure-ისა და სხვა ღრუბლოვანი სერვისების შემოსავალი 40%-ით გაიზარდა, რაც ანალიტიკოსების მოლოდინს აჭარბებს. პარალელურად, Microsoft 365 Copilot-ის ფასიანი მომხმარებლების რაოდენობამ 20 მილიონს მიაღწია. მნიშვნელოვანია ითქვას, რომ ხელოვნური ინტელექტის სექტორიდან მიღებულმა წლიურმა შემოსავალმა $37 მილიარდი შეადგინა.

მიუხედავად დადებითი მაჩვენებლებისა, Microsoft-ის სამომავლო ფინანსური პროგნოზები ანალიტიკოსების მოლოდინს ჩამორჩა. მომავალ კვარტალში კომპანია $86.7-დან $87.8 მილიარდამდე შემოსავალს ელოდება. ამასთან, 2026 წლისთვის კაპიტალური დანახარჯების მოცულობა $190 მილიარდამდე გაიზრდება. როგორც ირკვევა, ეს გადაწყვეტილება კომპონენტების გაძვირებითა და ხელოვნური ინტელექტის ინფრასტრუქტურაზე გაზრდილი მოთხოვნით არის განპირობებული.