რუს და ქართველ ხალხს ერთმანეთი მოენატრათ - მარია ზახაროვა
რუს და ქართველ ხალხს "ერთმანეთი მოენატრათ", სავიზო შეზღუდვების გაუქმება კი დიდი ხნის ნანატრი მოვლენა იყო - ამის შესახებ რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ სააგენტო "TASS"-თან ინტერვიუში განაცხადა.
"ვფიქრობ, ამ სივრცეში ქართულ დელეგაციას პირველად არ ხედავთ. დიახ, ჩვენ არ გვაქვს ოფიციალური დიპლომატიური ურთიერთობები, თუმცა, ამავდროულად, აქტიურად ვითარდება სავაჭრო, ეკონომიკური და ჰუმანიტარული კავშირები. საბოლოოდ - და ამ შემთხვევაში გამოვიყენებ სიტყვას 'ალილუია', რადგან ეს ძალიან ნანატრი იყო - სავიზო შეზღუდვები მოიხსნა.
და ის, რისი საშუალებაც, არსებითად, მხოლოდ შერჩეულ ჯგუფებსა და ამ ფორუმზე ჩამოსულ დელეგაციებს ჰქონდათ, ახლა ამ ქვეყნის თითოეულ მცხოვრებს, თითოეულ მოქალაქეს შეუძლია ჩვენ ყველას მივესალმებით. ჩვენ ნამდვილად მოგვენატრა ერთმანეთი. ეს არის საუკეთესო სიტყვა: მოგვენატრა ერთმანეთი", - აღნიშნა ზახაროვამ "ახალგაზრდობის მსოფლიო ფორუმზე" ფართო საერთაშორისო წარმომადგენლობის მნიშვნელობის შესახებ დასმულ კითხვაზე საპასუხოდ.
ზახაროვამ დასძინა, რომ საქართველო, როგორც რუსებისთვის ღია ტურისტული მიმართულება, განვითარებას განაგრძობს: "როგორ ხვდებიან იქ ჩვენს ხალხს, როგორი კარგი მომსახურებაა... და იმავეს თქმა შემიძლია რუსეთზეც. ჩვენ მივესალმებით როგორც ტურისტულ ნაკადებს, ისე ნებისმიერი სხვა ჰუმანიტარული, ეკონომიკური თუ საქმიანი მიზნით ჩამოსულ სტუმრებს, მათ შორის საერთაშორისო ღონისძიებებზე", - განმარტა მან.
რუსეთის საგარეო უწყების წარმომადგენლის თქმით, ის ქართულ დელეგაციას გაესაუბრა, ხოლო ჟურნალისტებმა - "კერძოდ, საქართველოს წარმომადგენლებმა" - მას კითხვებიც დაუსვეს.
"ჩვენ არასდროს აგვიგია ბარიერები და წინაღობები მათთვის, ვინც ჩვენთან მშვიდობით მოდიოდა. იქნებიან ეს არამეგობრული რეჟიმების მქონე ქვეყნების წარმომადგენლები თუ ჩვენი მოკავშირე სახელმწიფოების წარმომადგენლები - სეგრეგაცია არასდროს ყოფილა", - განაცხადა ზახაროვამ.
BM.GE
წყარო: bm.ge