რუსეთი მზესუმზირის ზეთის ექსპორტზე ბაჟს ასამმაგებს

რუსეთი მზესუმზირის ზეთის ექსპორტზე ბაჟს ზრდის. რუსული მედია სოფლის მეურნეობის სამინისტროზე დაყრდნობით წერს, რომ მზესუმზირის ზეთის ექსპორტზე ბაჟი ივლისში ტონაზე 3 294,2 რუბლამდე გაიზრდება, რაც თითქმის ივნისში არსებულ 1 337,5 რუბლს სამჯერ აღემატება.

მზესუმზირის შროტის (კოპტონის) ექსპორტზე ბაჟი, ისევე როგორც მაისსა და ივნისში, ნულოვანი იქნება.

ბაჟის მოცულობა საბაზისო და საინდიკაციო ფასებს შორის სხვაობის 70%-ს შეადგენს. მზესუმზირის ზეთის საბაზისო ფასი ტონაზე 90 750 რუბლია, ხოლო მზესუმზირის შროტის ტონაზე 17 463 რუბლია.

„ინტერფაქსის“ ინფორმაციით, რუსეთმა „მზესუმზირის დემპფერის“ მექანიზმი 2021 წლის 1 სექტემბრიდან შემოიღო. თავდაპირველად ბაჟი დოლარში იანგარიშებოდა, ხოლო 2022 წლის ივლისიდან - რუბლში.

2024 წლის აგვისტოში მცურავი ბაჟების მოქმედება ერთბაშად ორი წლით - 2026 წლის 1 სექტემბრამდე გაგრძელდა. 2025 წლის ოქტომბერში კი მთავრობამ მათი ვადები კიდევ უფრო გაახანგრძლივა - 2028 წლის 31 აგვისტომდე.

უნდა აღინიშნოს, რომ საქართველოსთვის რუსეთი მზესუმზირის ზეთის მთავარი მომწოდებელია. წელს 5 თვეში საქართველოს ზეთის იმპორტი გაუძვირდა.